Samarqand viloyatida yo‘l harakati qoidalarini qo‘pol ravishda buzish holatlari yana jamoatchilik e’tiborida. Viloyat IIB YHXB matbuot xizmati xabariga ko‘ra, mahalliy yigit 10 kun ichida ikki marta drift harakatini amalga oshirgani uchun jazoga tortildi.
Ma’lum bo‘lishicha, ushbu shaxsda haydovchilik guvohnomasi ham mavjud bo‘lmagan. U avval drift qilib qoidabuzarlik sodir etgani uchun javobgarlikka tortilgan, ammo o‘z qilmisidan xulosa chiqarmasdan yana shu xatoni takrorlagan.
“Xatoni angladik, endilikda qaytarmaymiz. Haydovchilik guvohnomasini olmasdan mashina ruliga o‘tirmaymiz”, — deya izoh bergan qoidabuzar yigit.
Shu bilan birga, viloyatda yana bir nechta holat qayd etilgan. Xususan, bir fuqaro Nexia avtomobil raqamini VAZ-2107 mashinasiga o‘rnatib, to‘y marosimida qoidalarni buzgan. Yana bir shaxs esa Gentra rusumli mashinasida nikoh to‘yida drift qilib, yo‘l harakati xavfsizligini tahdid ostiga qo‘ygan.
Barcha haydovchilarga nisbatan tegishli bayonnomalar rasmiylashtirilgan hamda ularning avtomobillari jarima maydonchasiga joylashtirilgan.
Mutaxassislar ta’kidlashicha, yo‘ldagi har bir qoidabuzarlik nafaqat haydovchining o‘zini, balki atrofdagilar hayotini ham xavf ostiga qo‘yadi. Shu bois jamoatchilik qoidaga rioya qilishning qanchalik muhimligini unutmaslikka chaqirilmoqda.
“Zamin”ni Telegramʻda oʻqing!
