Toshkent shahrida sodir bo‘lgan janjal va uning og‘ir oqibatlari keng muhokamalarga sabab bo‘ldi. Tungi klub oldida chiqqan mojaro davomida ularni ajratishga urinib, o‘rtaga kirgan fuqaro qattiq jarohat olib, koma holatiga tushgan edi. U shifoxonaga “bosh miya jarohati, yuzida yirtilgan jarohat va spirtli ichimlikdan zaharlanish” tashxisi bilan yotqizilgani haqida avvalroq ma’lum qilingan.
Endilikda bu voqea bo‘yicha ayblanayotgan shaxs — 1995 yilda tug‘ilgan A.Sh.ning sud jarayoni boshlandi. Unga Jinoyat kodeksining qasddan og‘ir tan jarohati yetkazish, firibgarlik va bezorilik bilan bog‘liq bir nechta moddalar asosida ayblov qo‘yilgan. Mazkur ish Mirzo Ulug‘bek tuman sudida ko‘rib chiqilmoqda.
Oliy sud matbuot kotibi Aziz Obidov ma’lumot berishicha, sud jarayoni ochiq tarzda emas, balki yopiq shaklda o‘tkaziladi. Sabab sifatida sudlanuvchining shaxsiy va oilaviy hayotiga oid ma’lumotlar oshkor bo‘lishi mumkinligi va oila a’zolarining xavfsizligini ta’minlash zarurati ko‘rsatilgan. Shuningdek, aybsizlik prezumpsiyasi tamoyiliga amal qilish ham asos qilib olingan.
Sudlanuvchining advokatlari iltimosnoma kiritganidan keyin raislik qiluvchi sudya tomonidan u qanoatlantirildi va sud jarayoni yopiq tarzda davom ettirilishi belgilandi.
Rasmiy ma’lumotda ta’kidlanishicha, ish natijasi bo‘yicha adolatli va qonuniy hukm chiqarilishi ta’minlanadi. Jamoatchilikda katta qiziqish uyg‘otgan bu ish yuzasidan sud yakuniga yetgach, ommaviy axborot vositalariga qo‘shimcha axborot taqdim etilishi ham qayd etildi.
“Zamin”ni Telegramʻda oʻqing!
