Bolalarga nisbatan zo‘ravonlik uchun javobgarlik kuchaytiriladi

16-sentabr kuni Oliy Majlis Qonunchilik palatasi bolalarni zo‘ravonlikdan himoya qilish tizimini takomillashtirishga qaratilgan qonun loyihasini ikkinchi o‘qishda ma’qulladi, deb Uz24.uz xabar berdi.

Qonun loyihasiga ko‘ra, Jinoyat va Ma’muriy javobgarlik kodekslariga o‘zgartirishlar kiritiladi. Bolalar ishtirokidagi pornografik materiallarni saqlaganlik uchun javobgarlik belgilanadi. Shuningdek, internet yoki boshqa vositalar orqali bolalarga nisbatan jinsiy zo‘ravonlik uchun jazo kuchaytiriladi.

Yangi normalar bolalarning ruhiy salomatligini asrashga qaratilgan. Tergov davomida bola guvoh yoki jabrlanuvchi bo‘lsa, so‘roq muddati cheklanadi va qonuniy vakilining ishtiroki majburiy bo‘ladi.