Farg‘ona viloyatida oilaviy zo‘ravonlik bilan bog‘liq yana bir qonli voqea qayd etildi. Bag‘dod tumanida yashovchi 60 yoshli erkak o‘z turmush o‘rtog‘ini shafqatsizlarcha kaltaklab, uni og‘ir ahvolga solib qo‘ydi. Bu haqda mahalliy manbalar xabar tarqatdi.
Ma’lumotlarga ko‘ra, hodisa soat 19:00 lar atrofida Dasht mahallasida sodir bo‘lgan. Qo‘shnilarning aytishicha, ushbu oilada janjallar tez-tez kuzatilib turgan. Shu kuni ham turmush o‘rtoqlar o‘rtasida og‘ir tortishuv yuzaga kelib, erkak avvalo xotinini haqorat qilgan, keyin esa uni ayovsiz kaltaklay boshlagan.
Ayol urilganidan keyin o‘rnidan turolmay qolgan. Uning ojiz holatini ko‘rgan qizlari tezda yordamga kelib, onasini qutqarishga uringan. Olingan jarohatlar sabab jabrlanuvchi kasalxonaga olib borilgan va unga shoshilinch tibbiy yordam ko‘rsatilgan.
Rasmiy ma’lumotlarga ko‘ra, erkakka nisbatan jinoyat ishi qo‘zg‘atildi. Sudda u O‘zbekiston Respublikasi Jinoyat kodeksining 126-1-moddasi 6-qismi (Oilaviy zo‘ravonlik) bo‘yicha aybdor deb topildi. Natijada u 3 yil muddatga ozodlikdan mahrum etish jazosiga hukm qilindi.
Mutaxassislar ta’kidlashicha, oilaviy zo‘ravonlik nafaqat yakka shaxsga, balki butun jamiyatga katta zarar yetkazadi. Bunday holatlar bolalarning ruhiyatiga ham ta’sir qiladi va ularning kelajakdagi hayotiga salbiy iz qoldirishi mumkin.
Jamoatchilik fikricha, oilaviy mojarolarni barvaqt hal etish, psixologik maslahat va huquqiy yordam tizimini kuchaytirish bu kabi fojialarning oldini olishga yordam berishi mumkin.
“Zamin”ni Telegramʻda oʻqing!
