Rossiyada muhojirlar bilan bog‘liq mojaro jamoatchilik orasida katta shov-shuvga sabab bo‘lmoqda. Oxirgi ma’lumotlarga ko‘ra, huquq-tartibot idoralari ushbu ish yuzasidan yana bir shaxsni qo‘lga oldi. Tergov qo‘mitasi bayonotida qayd etilishicha, qo‘lga olingan shaxs — 15 yoshli voyaga yetmagan Rossiya fuqarosi bo‘lib, u bezorilikda ayblanayotgan yigitlar guruhi tarkibida bo‘lgan.
Voqea 13 sentyabr kuni Vladivostok shahrida yuz bergan. Tergov ma’lumotlariga ko‘ra, mast holda yurgan bir guruh yoshlar turli bezorilik harakatlarini sodir etgan. Avvalo, ular sababsiz holda yo‘l chetida to‘xtab turgan avtomobilga shikast yetkazgan va uning ichiga aerozol sepishgan. Keyin esa yuk mashinasi haydovchisiga hujum qilib, unga tan jarohatlari yetkazishgan.
Bu bilan cheklanmagan yigitlar Xabarovskaya ko‘chasidagi 24 soatlik do‘konga bostirib kirib, xaridorlar va sotuvchi ko‘z o‘ngida taksi haydovchisi hamda uning yo‘lovchisiga tashlanishgan. Shu bilan birga, ko‘chada tosh va turli buyumlarni qurol sifatida ishlatib, odamlarga tajovuz qilishgan va yana bir fuqaroni kaltaklab qo‘yishgan.
Natijada Rossiya Jinoyat kodeksining 213-moddasi 2-qismi (“Bezorilik”) bo‘yicha jinoyat ishi qo‘zg‘atildi. Huquq-tartibot organlari ikki gumonlanuvchini qo‘lga olgan bo‘lsa, yana bir shaxs hali ham qidiruvda ekani ma’lum qilindi.
Mahalliy manbalarning aytishicha, bu kabi holatlar nafaqat migrantlar xavfsizligi, balki umumiy jamoat tartibiga ham jiddiy tahdid soladi. Ekspertlar esa yoshlar o‘rtasida nazoratni kuchaytirish va bunday harakatlarga mutlaqo yo‘l qo‘ymaslik zarurligini ta’kidlamoqda.
“Zamin”ni Telegramʻda oʻqing!
