Toshkent shahrida yuz bergan mudhish voqea butun jamoatchilikni hayajonga soldi. Ijtimoiy tarmoqlarda tarqalgan ma’lumotlarga ko‘ra, Olmazor tumanida yashovchi yosh ona rashk va oilaviy nizo oqibatida o‘z farzandlarini hamda o‘zini baland qavatdan tashlab yuborgan.
Bosh prokuratura matbuot kotibi Hayot Shamsutdinov Qalampir.uz'ga ma’lum qilganidek, fojia 17 sentyabr kuni soat 14:18 larda qayd etilgan. 2001 yilda tug‘ilgan ayol turmush o‘rtog‘i bilan kelishmovchilikka borgani uchun jahl bilan harakat qilgan. U ikki nafar — 2022 va 2024 yillarda tug‘ilgan farzandlarini uyning 4-qavatidagi yo‘lak derazasidan pastga tashlab yuborgan. Keyin esa o‘sha uyning 8-qavatidan o‘zini ham tashlashga qadam qo‘ygan.
Afsuski, ayol shifoxonada hayotdan ko‘z yumdi. Ammo kichik yoshdagi ikki bolaning hayoti vrachlar tomonidan saqlab qolingani ma’lum qilindi.
Hozirda mazkur holat yuzasidan O‘zbekiston Respublikasi Jinoyat kodeksining 25 va 97-moddalari (qasddan odam o‘ldirishga suiqasd qilish) bilan jinoyat ishi qo‘zg‘atilib, tergov harakatlari olib borilmoqda.
Ayni paytda ijtimoiy tarmoqlarda ona o‘zini yerga tashlab, yuztuban yotgan holati aks etgan videolar tarqaldi. Fuqarolar bu holatni qattiq qoralab, bolalar hayotini xavfga qo‘yishni insoniylikdan yiroq harakat sifatida baholamoqda.
Mutaxassislar ta’kidlashicha, bu kabi fojealarning oldini olish uchun oiladagi nizolarni erta hal qilish, psixologik yordam xizmatlarini kuchaytirish va aholida oilaviy mas’uliyat tuyg‘usini mustahkamlash zarur. Jamiyatdagi har bir insonning ruhiy holati va oilaviy munosabatlari nafaqat shaxsiy hayoti, balki bolalarning kelajagiga ham katta ta’sir ko‘rsatishi aytib o‘tilmoqda.
“Zamin”ni Telegramʻda oʻqing!
