Surxondaryo viloyati markazi Termiz shahrida jamoatchilik orasida keskin muhokamalarga sabab bo‘lgan holat qayd etildi. Yo‘l harakati xavfsizligi davlat inspeksiyasi ma’lumoticha, bir ayol o‘zining voyaga yetmagan o‘g‘lini avtomashina ruliga o‘tqazib, yo‘lda harakatlanishiga yo‘l qo‘ygan.
Hodisa tasodifan emas, balki shahardagi ta’lim muassasasi yaqinida o‘rnatilgan videokuzatuv kameralari orqali qayd etildi. Kadrlarda ona bolasiga rulni ishonib topshirgani va yo‘lda harakatlangani aniq ko‘rinadi. Mutaxassislar ta’kidlashicha, bu nafaqat bolaning hayoti, balki yo‘ldagi barcha ishtirokchilar xavfsizligi uchun katta tahdiddir.
Viloyat YHXB xabarida aytilishicha, bu kabi holatlar ta’lim muassasalari atrofida o‘rnatilgan kameralar orqali muntazam kuzatib boriladi. Agar ota-onalar farzandining salohiyatini “ko‘z-ko‘z qilish” maqsadida qonunga xilof harakat qilsa, ular aniqlanadi va belgilangan tartibda javobgarlikka tortilsa, ajab emas.
«Qonun o‘yinchoq emas. Avtomashina boshqarish faqatgina belgilangan huquq mavjud bo‘lganda mumkin. Voyaga yetmagan farzandni rulga o‘tqazish — bu xavfli va mas’uliyatsiz harakat», — deyiladi YHXB bayonotida.
Mutasaddilarning ta’kidlashicha, bu kabi “tajriba”lar bolalarda noto‘g‘ri ko‘nikmalar shakllantirishi va kelgusida yanada og‘ir oqibatlarga olib kelishi mumkin. Shu bois barcha ota-onalardan ehtiyotlikka va qonun qoidalariga rioya qilishga chaqirildi.
“Zamin”ni Telegramʻda oʻqing!
