Samarqand viloyatining Nurobod tumanidagi 1-sonli maktabgacha ta’lim muassasasida bolalarga sifatsiz va aynigan oziq-ovqat mahsulotlari taqdim etilgani, shuningdek, ovqatlarning gigiyena va saqlash talablariga amal qilinmagani haqida murojaat kelib tushdi. Murojaatda, shuningdek, ushbu bog‘chada 50 dan ortiq bola bir xil kasallik bilan og‘rigani ma’lum qilingan.
Mazkur holatga viloyat Maktabgacha va maktab ta’limi boshqarmasi munosbat bildirib, viloyat Sanitariya va epidemiologiya jamoat salomatligi boshqarmasi mutaxassislari bilan birgalikda ishchi guruhi tuzilib, holat o‘rganildi. Ushbu tekshiruv davomida 1-sonli Maktabgacha ta’lim tashkilotida ishlaydigan oshpazlar ovqat tayyorlashdagi texnologiyalarga rioya etmagani va e’tiborsizliklari sababli kechki ovqatga tayyorlangan shirin kulchalarning kuydirib pishirilgani aniqlandi. Bu holat bo‘yicha autsorsing xizmatini ko‘rsatgan “Proof food” MCHJ korxonasi rahbariyatiga ogohlantirish berildi.
Tekshiruvlar natijasida autsorsing tomonidan sifatsiz go‘sht mahsulotlari yetkazib berilgani haqidagi xabarlar o‘z isbotini topmadi. Nurobod tuman tibbiyot birlashmasi va Sanepidqo‘mita tuman birlashmasi epidemiologlari ma’lumot berishicha, 30 sentyabrdan bugunga qadar bog‘cha yoshdagi bolalarning ovqatdan zaharlanishi haqida murojaatlar qabul qilinmagan. Shuningdek, 50 dan ortiq bolalarning bir xil kasallik bilan og‘rigani haqidagi xabar ham rad etildi.
Bu holat jamoat salomatligiga jiddiy xavf solmasdan, oilaviy va ijtimoiy ehtiyojlarni qondirish maqsadida hal qilindi. Mazkur voqea bolalarning ovqatlanish muhitiga bo‘lgan diqqatni yanada oshirishga sabab bo‘ldi.
“Zamin”ni Telegramʻda oʻqing!
