O‘zbekiston tibbiyoti tarixida yana bir noyob voqea ro‘y berdi. Respublika shifokorlari siam egizaklarini murakkab va yurakni titratuvchi operatsiya orqali muvaffaqiyatli ajratib olishdi. Bu haqda Sog‘liqni saqlash vazirligi rasman ma’lum qildi.
Ma’lum bo‘lishicha, amalga oshirilgan amaliyot Chirchiq shahrida joylashgan Respublika ixtisoslashtirilgan ona va bola salomatligi ilmiy-amaliy tibbiyot markazining Toshkent viloyati filialida o‘tkazilgan. Homiladorlikning 33–34 haftasida kesarcha kesish orqali tug‘ilgan siam egizaklar tug‘ilganidan atigi 9 soat o‘tib shoshilinch ravishda operatsiya qilingan.
Mahalliy sharoitda, yuksak aniqlik talab etuvchi texnologik usullar yordamida amalga oshirilgan operatsiya besh soat davom etgan. Bu murakkab jarayonni Respublika perinatal markazi qoshidagi Neonatal xirurgiya markazi rahbari, tibbiyot fanlari doktori, professor Baxtiyor Ergashev boshchiligidagi tajribali mutaxassislar guruhi amalga oshirgan.
Professorning ta’kidlashicha, bunday operatsiyalar hatto tibbiyot darajasi yuqori bo‘lgan davlatlarda ham uzoq tayyorgarlik va keng tahlillardan so‘ng bajariladi. Shu bois bu muvaffaqiyatli natija mamlakat tibbiyoti salohiyati oshganining yorqin misoli sifatida baholanmoqda.
Bugun, 8 oktyabr kuni Sog‘liqni saqlash vaziri Asilbek Xudoyorov shaxsan mazkur chaqaloqlar holidan xabar oldi va operatsiyani bajargan shifokorlar jamoasi bilan uchrashdi. U o‘z nutqida ushbu amaliyotning nafaqat tibbiy, balki insonparvarlik ahamiyatini ta’kidlab, quyidagicha izhor qildi:
— Bunday murakkab amaliyotlar dunyo bo‘ylab ham har doim bajarilavermaydi. Bizda bunday operatsiya viloyat darajasida amalga oshirilib, muvaffaqiyatli yakunlandi. Bu — milliy tibbiyotimiz yangi bosqichga ko‘tarilganidan dalolat, — dedi vazir.
Vazirlik ma’lumotiga ko‘ra, operatsiyada ishtirok etgan bir guruh shifokorlar va mutaxassislar “O‘zbekiston Respublikasi sog‘liqni saqlash a’lochisi” ko‘krak nishoni bilan taqdirlandi.
Hozirda chaqaloqlar va ularning onasi sog‘lom ahvolda. Ularga shifoxonadan chiqish ruxsati berilib, shifokorlar ularning keyingi tiklanish jarayonini doimiy nazoratda ushlab turishini ma’lum qildi.
Muttaxassislar fikricha, bu kabi amaliyotlar mahalliy tibbiyot tizimining ilg‘or texnologiyalarga asoslangan holda rivojlanayotganidan, shifokorlar malakasining ortib borayotganidan dalolatdir.
O‘zbekiston tibbiyoti so‘nggi yillarda nafaqat yuqori malakali kadrlar, balki zamonaviy uskunalar va ilmiy yondashuvlar orqali xalqaro darajaga yaqinlashayotgani yana bir bor tasdiqlandi.
Shu tariqa, Chirchiqda amalga oshirilgan ushbu noyob operatsiya nafaqat ikki chaqaloqning hayotini saqlab qoldi, balki butun mamlakat tibbiyoti uchun yangi umid va ishonch ramziga aylandi.
“Zamin”ni Telegramʻda oʻqing!
