Toshkent viloyatida yana bir noxush holat jamoatchilik e’tiboriga tushdi. Yuqori Chirchiq tumanidagi 6-sonli davlat maktabgacha ta’lim muassasasida bolalarga sifati shubhali, hatto yonib ketgan shirinliklar berilgani haqida ma’lumot tarqaldi. Bu haqda tegishli idoralarga rasmiy murojaat kelib tushgan.
Murojaatda aytilishicha, bunday holatlar maktabgacha ta’lim muassasasida ilgari ham kuzatilgan. Bolalarga berilgan ovqat mahsulotlari me’yor va tarkibga rioya etilmagan holda tayyorlanar, faqat tekshiruv bo‘lishi oldidan taomlar “chiroyli va mazali” qilib tayyorlanar ekan.
Toshkent viloyati Maktabgacha va maktab ta’limi boshqarmasi holat yuzasidan izoh berdi. 8 oktyabr kuni tuman ta’lim bo‘limi mas’ullari hamda Sanitariya-epidemiologiya osoyishtalik va jamoat salomatligi bo‘limi mutaxassislaridan iborat ishchi guruh tashkil etildi.
Tekshiruvlar jarayonida ma’lum bo‘lishicha, voqea 16 sentyabr kuni tushlik payti sodir bo‘lgan. Oshpaz A.E. tayyorlagan pishiriqlar pishirish vaqtida yonib ketgan va tarbiyachi J.E. ularni shunday holda bolalarga tarqatgan. Ammo muassasa xodimlaridan biri — S.P. bu holatga e’tibor berib, bolalarga shirinlikni bermagan, hatto bu kabi xatolarning muntazam takrorlanishini oldini olish uchun ta’minotchilarni ham ogohlantirgan.
Shu bilan birga, tashkilot hamshirasi D.H. ushbu mahsulotlarni “sifatli va yaroqli” deb hujjatlarda qayd etgani aniqlangan. Bu holat mas’uliyatsizlik sifatida baholandi.
O‘rganishlar natijasida autsorsing kompaniyasi tomonidan ishga olingan oshpaz A.E. xizmat vazifasini bajarishda yo‘l qo‘ygan qo‘pol xatolari sabab ishdan bo‘shatildi. Shuningdek, muassasa rahbari S.M. nazoratni sust yo‘lga qo‘ygani uchun rasman ogohlantirildi, hamshira D.H.ga esa “hayfsan” intizomiy jazosi qo‘llandi.
Hozirda 6-sonli bog‘chada ovqatlanish tizimi va mahsulotlar sifati tuman sanitariya bo‘limi xodimlari tomonidan qat’iy nazoratga olingan. Kamchiliklarni bartaraf etish ishlari olib borilmoqda.
Mutaxassislar ta’kidlashicha, bolalar sog‘lom va xavfsiz ovqatlanishi — har bir ta’lim muassasasining asosiy burchi. Shu bois, bu kabi holatlar jamoatchilik nazoratida bo‘lishi va har bir mas’ul shaxs o‘z vazifasiga vijdonan yondashishi zarur.
Shunday qilib, Yuqori Chirchiqda sodir bo‘lgan ushbu holat nafaqat ma’lum bir bog‘cha, balki butun maktabgacha ta’lim tizimidagi mas’uliyat va nazorat masalasini yana kun tartibiga olib chiqdi.
“Zamin”ni Telegramʻda oʻqing!
