O‘zbekistonda yarim yilda 50 ga yaqin talabalar narkotik savdosida qo‘lga tushdi, deb Uznews xabar berdi.
Prezident huzuridagi Narkotik moddalar ustidan nazorat milliy markazi maʻlumotiga koʻra, 2025 yilning dastlabki olti oyi ichida 46 nafar talabaniing narkotik savdosiga aloqadorligi aniqlangan. Bu haqda markaz katta inspektori Muhammadqodir Mahmudov maʻlum qildi.
Uning so‘zlariga ko‘ra, oxirgi paytlarda jinoyiy guruhlar talabalarni narkotik tashuvchi sifatida faol jalb etmoqda. Oliy ta’lim muassasalariga kirgan yoshlar noqonuniy faoliyatga tortilayotgani kuzatilmoqda.
Shuningdek, inspektor mamlakatda yashirin narkolaboratoriyalar soni ortib borayotganini ta’kidladi. Agar 2024 yil davomida 5 ta bunday laboratoriya aniqlangan bo‘lsa, 2025 yilning yarim yilligidayoq 8 ta holat qayd etilgan.
Mahmudovning aytishicha, endi narkotiklar tabiiy mahsulotlarda emas, balki ichimliklar, energetiklar, kofe va shirinliklar kabi mahsulotlarda ham uchramoqda. Ushbu moddalarni faqat bir marta isteʻmol qilish ham kuchli bog‘liqlikka olib kelishi mumkin.
Inspektorning ta’kidlashicha, yangi turdagi narkotiklar odamdаgi o‘zgarishni darhol namoyon qilmaydi. Shu bois ko‘plab ota-onalar farzandlaridagi o‘zgarishni yaxshi tomonga deb o‘ylaydi, aslida esa bu illatning dastlabki belgilari bo‘ladi. Vaqt o‘tishi bilan og‘riq, ruhiy iztirob va hatto suiqasd holatlari ham uchrayotgani aytildi.
2025 yilda narkotik jinoyatlar soni 2024 yilga nisbatan 23 foizga oshgan. Muhammadqodir Mahmudov fuqarolarni, ayniqsa ota-onalarni, farzandlariga nisbatan e’tiborli va hushyor bo‘lishga chaqirdi.
“Zamin”ni Telegramʻda oʻqing!
