Samarqand shahrida qimorga berilib ketgan yigit ustidan nazorat o‘rnatish maqsadida og‘ir jinoyat sodir etildi. Aka-uka uni “tarbiyalash” bahonasida daraxtga bog‘lab, elektr kabeli bilan kaltaklagan. Buning oqibatida uka jon berdi, deb xabar berdi “Zamon” dasturi.
Ma’lumotlarga ko‘ra, fojia joriy yilning 20 iyun kuni sodir bo‘lgan. 29 yoshli marhum internetdagi tavakkalchilik va qimor o‘yinlariga qattiq berilgan. Uning qarzlari ko‘paygani sababli oilasi bu vaziyatni nazorat qilishga harakat qilgan. Ammo bu harakat fojea bilan yakunlangan.
Hodisa kuni aka-uka ukasini bog‘lab, unga bir necha bor jismoniy zarba bergan. Elektr simlari bilan urish natijasida u og‘ir tan jarohatlari olgan. Yigit uyga olib kirilgandan so‘ng holsizlanib, vafot etgan.
Marhumning rafiqasi sud jarayonida aytganidek, u eridan yomonlik ko‘rmagan, kredit qarzlarini ham mustaqil to‘lab kelgan. “Qaynakam 'shu yo‘l bilan to‘g‘ri bo‘ladi' deb o‘ylagan, lekin erim voqeadan oldin qarzini to‘lab bo‘lgandi”, — degan u ko‘z yoshi bilan.
Voqea vaqtida marhumning ota-onasi Rossiyada bo‘lgan va ular sudda ham jabrlanuvchi, ham da’vogar sifatida qatnashishgan.
Samarqand shahar sudi ayblanuvchilarga hukm o‘qidi. Sud xulosasiga ko‘ra, marhumning akasi Jinoyat kodeksining 104-moddasi 3-qismi “d” bandi va 138-moddasi 2-qismi “a” bandi bilan aybdor deb topildi. U 8 yil 6 oy muddatga ozodlikdan mahrum etildi. Ukasi esa 6 yil 6 oy qamoqda o‘taydi.
Mutaxassislar ta’kidlamoqda: bu fojea qimor illati nafaqat mol-mulk, balki inson hayotini ham yo‘q qilishini yana bir bor isbotladi. Qimorga qarshi kurash — faqat huquqiy emas, balki ma’naviy vazifadir.
“Zamin”ni Telegramʻda oʻqing!
