Samarqand viloyatining Qo‘shrabot tumanidagi 71-maktabda ro‘y bergan noxush holat jamoatchilikning e’tiborini tortdi. Ma’lum bo‘lishicha, maktab xodimasi boshlang‘ich sinf o‘quvchisiga qo‘l ko‘targani uchun ishdan ozod etildi, deb xabar berdi vilmaktab.uz.
6 oktyabr kuni soat 09:30 larda maktabning kadrlar bo‘yicha menejeri Q.S. tanaffus vaqtida o‘z farzandining shikoyatini eshitgan. Unga ko‘ra, bola sinfdoshi bilan tortishib qolgan va jahli chiqqan ona o‘sha sinfga kirib, bolani urib yuborgan.
Tez orada vaziyat huquqni muhofaza qiluvchi organlar tomonidan nazoratga olingan. Bolaning jarohat olgan-olmaganini aniqlash uchun ekspertiza tayinlangan. Tekshiruv natijalarida bolaga yengil tan jarohati yetkazilgani ma’lum bo‘ldi.
Shundan so‘ng, viloyat Maktabgacha va maktab ta’limi boshqarmasi xodimning mehnat shartnomasi bekor qilinganini ma’lum qildi. Shu bilan birga, maktabda ichki intizom qoidalariga rioyani ta’minlamagan ma’naviy-ma’rifiy ishlar bo‘yicha direktor o‘rinbosariga ham intizomiy jazo chorasi ko‘rildi.
Bu holat yana bir bor ta’lim muassasalarida muloqot madaniyati, sabr-toqat va bolalarga nisbatan ehtiyotkorlikning muhimligini eslatdi. Bolalarni tarbiyalash nafaqat bilim berish, balki ehtirom va mehr bilan munosabatda bo‘lishni ham talab qiladi.
“Zamin”ni Telegramʻda oʻqing!
