Samarqand viloyatining Tayloq tumanida yuz bergan fojiali yo‘l-transport hodisasi bo‘yicha sud hukmi e’lon qilindi. Tergov ma’lumotlariga ko‘ra, “Lacetti” rusumli avtomobil haydovchisi 21 iyun kuni soat 19:00 atrofida Do‘stlik mahallasida tezlikni oshirib, yo‘l chetida turgan 5 yoshli bolani urib yuborgan va voqea joyidan qochib ketgan.
Qizaloq olgan og‘ir tan jarohatlari oqibatida voqea joyida halok bo‘lgan.
Sud majlisida ayblanuvchi mast holatda bo‘lganini tan olgan va o‘z qilmishi uchun pushaymonligini bildirgan. Shuningdek, u marhumaning oila a’zolaridan kechirim so‘ragan va moddiy ahvoli og‘irligini hisobga olishni so‘ragan.
Sud haydovchining ilgari ham jinoyat sodir etganini va xavfli harakat orqali inson hayotiga tahdid keltirganini inobatga oldi.
Hukmga ko‘ra, u besh yil olti oy muddatga ozodlikdan mahrum etildi va jazoni o‘tab bo‘lgach, ikki yil davomida transport vositasini boshqarish huquqidan mahrum bo‘ladi.
Mutaxassislar yana bir bor haydovchilarni spirtli ichimlik iste’mol qilgan holda rulga o‘tirmaslikka va harakat qoidalariga qat’iy rioya qilishga chaqirmoqda.
“Zamin”ni Telegramʻda oʻqing!
