Farg‘ona viloyatida bolalarga noo‘rin savollar bergan tarbiyachiga nisbatan intizomiy chora qo‘llandi, deb xabar berdi viloyat Maktabgacha va maktab ta’limi boshqarmasi.
Ijtimoiy tarmoqlarda tarqalgan videoda tarbiyachi bolalardan “dadasidan qanday hid kelishi” haqida so‘rab, og‘zaki so‘rovnoma o‘tkazgani aks etgan. Ma’lum bo‘lishicha, mazkur holat Furqat tumanidagi 1-sonli davlat bog‘chasida sodir bo‘lgan.
Tekshiruv davomida aniqlanishicha, tarbiyachi S.O. mazkur so‘rovnomani o‘quv dasturlarida ko‘zda tutilmagan holda, mustaqil ravishda o‘tkazgan va videoni ota-onalar uchun tuzilgan Telegram guruhiga joylashtirgan.
U bilan suhbat o‘tkazilib, u qilgan ishi oqibatlarini o‘ylab ko‘rmaganini tan olgan. Shuningdek, uning ish hujjatlari va faoliyati to‘liq tekshirilib, ayrim kamchiliklar aniqlangan.
Natijada tarbiyachidan tushuntirish xati olindi va unga nisbatan hayfsan intizomiy jazosi qo‘llandi.
Boshqarmaga ko‘ra, bu holat pedagogik etika talablarini buzish deb baholanib, boshqa tarbiyachilarga ham bunday xatolarni takrorlamaslik bo‘yicha ogohlantirish berildi.
“Zamin”ni Telegramʻda oʻqing!
