Toshkent shahrida bir erkak boshqa birovning avtomobilni olib qochdi, deb xabar berdi poytaxt Ichki ishlar bosh boshqarmasi.
Ma’lumotlarga ko‘ra, u mablag‘siz qolgani uchun biror narsa o‘g‘irlab tirikchilik qilish niyatida harakat qilgan. Mashinaning eshigi yopilmagani va kaliti o‘t oldirgichda turganidan foydalanib, u transport vositasini haydap ketgan.
Bektemir tumanidagi Chirchiq bo‘yiga borgach, avtomobil salonidan ikki dona monitor, videoregistrator, fonar va sumka olgan. Keyin mashinani tashlab, voqea joyidan qochib ketgan.
“Qilgan ishimdan qattiq afsusdaman. Hech kimga bunday qilmaslikni maslahat beraman. Bu yaxshi yo‘l emas ekan, oqibatini bilmadim”, — degan gumonlanuvchi.
Ma’lum bo‘lishicha, u avval ham sudlangan. Hozirda unga nisbatan Jinoyat kodeksining 267-moddasi 2-qismi “g” bandi bo‘yicha jinoyat ishi qo‘zg‘atilgan va qamoq ehtiyot chorasi qo‘llanilgan.
Tergov harakatlari davom etmoqda.
“Zamin”ni Telegramʻda oʻqing!
