Turkiya va O‘zbekiston Ichki ishlar vazirliklari hamkorligida o‘tkazilgan maxsus tezkor operatsiya natijasida kiberfiribgarlikda gumon qilingan 20 yoshli O‘zbekiston fuqarosi Umid Zohirjonov qo‘lga olindi va O‘zbekistonga qaytarildi.
Bu haqda mamlakatning Istanbul shahridagi Bosh konsulxonasi ma’lum qildi.
Ma’lumotlarga ko‘ra, 2005 yilda tug‘ilgan Umid Zohirjonov Dilshod o‘g‘li internet orqali turli onlayn firibgarlik usullari bilan 10 dan ziyod fuqaroning mablag‘ini o‘zlashtirgan. Ushbu shaxs xalqaro qidiruvda bo‘lgan.
Rasmiy ma’lumotda qayd etilishicha, uning jinoiy xatti-harakatlari natijasida jabr ko‘rgan fuqarolar O‘zbekiston Ichki ishlar vazirligiga, uning hududiy bo‘linmalariga yoki Istanbuldagi Bosh konsulxonaga murojaat qilishlari mumkin.
Shu bilan birga, mas’ul idoralar ta’kidlaganidek, jinoiy javobgarlikdan qochib, xorijda yashirinib yurgan har bir shaxsga nisbatan qidiruv va jinoiy ta’qib izchil ravishda davom ettiriladi.
Istanbuldagi Bosh konsulxona so‘nggi paytlarda fuqarolar tomonidan firibgarlik holatlari bo‘yicha murojaatlar ko‘payganini ma’lum qilar ekan, odamlardan hushyor bo‘lishni va shubhali onlayn takliflarga ishonmaslikni so‘radi.
“Zamin”ni Telegramʻda oʻqing!
