Bugun, 11-noyabr kuni kechasi Toshkent vaqti bilan soat 22:32 da Namangan viloyati hududida yer qimirlashi sodir bo‘ldi. Bu haqda Seysmoprognostik Respublika markazi rasman ma’lumot berdi.
Ma’lumotlarga ko‘ra, tabiiy harakatning magnitudasi 3,9 ballni tashkil etgan bo‘lib, zilzila epimarkazi Toshkent shahridan taxminan 193 kilometr janubi-sharqda, ya’ni Kosonsoy tumani hududida joylashgan. Epimarkazdagi quvvat 4 ball bo‘lgan. Yer qimirlashi 16 kilometr chuqurlikda qayd etilgan. Geografik koordinatalar 41,21 daraja shimoliy kenglik va 71,52 daraja sharqiy uzunlikni tashkil etadi.
Markaz ma’lumotlariga ko‘ra, zilzila Namangan viloyatida 2–3 ball darajasida sezilgan. Hodisa natijasida zarar ko‘rganlar yoki yirik vayronagarchiliklar haqida ma’lumot kelib tushmagan.
Hozirda mahalliy favqulodda vaziyatlar xizmatlari va seysmologlar hududdagi holatni kuzatmoqda. Mutaxassislar ma’lum qilishicha, bu turdagi kuchsiz zilzilalar Farg‘ona vodiysi hududlarida vaqt-vaqti bilan tabiiy jarayon sifatida kuzatilib turadi.
Eslatib o‘tamiz, bundan bir necha kun oldin Buxoro viloyatining Gazli shahrida ham 3,2 magnitudali yer silkinishi sodir bo‘lgan edi. Unda ham halokat yoki zarar qayd etilmagan.
“Zamin”ni Telegramʻda oʻqing!
