Sirdaryoda to‘rt mashina to‘qnashdi, bir haydovchi jarohatlandi

Sirdaryo viloyatida bir vaqtda to‘rtta avtomashina ishtirokida yo‘l-transport hodisasi sodir bo‘lib, bir haydovchi jarohat oldi. Bu haqda viloyat YHXB ma’lumot berdi.

Ma’lumotlarga ko‘ra, 30 noyabr kuni soat 13:45 da Mirzaobod tumanidagi “Oqoltin” MFY hududidan o‘tuvchi M-34 yo‘lining “Dushanbe–Toshkent” yo‘nalishi 94-kilometrida Isuzu haydovchisi navbat bilan burilmoqchi bo‘lgan VAZ-2101 va ikkita Nexia-3 avtomashinalarining orqa tomonidan kelib urilgan.

To‘qnashuv natijasida VAZ-2101 haydovchisi tibbiy yordamga murojaat qilgan. Qolgan mashinalarga moddiy zarar yetgan.

Mirzaobod tumani IIB tomonidan hodisa yuzasidan surishtiruv harakatlari olib borilmoqda. YHXB barcha haydovchilarni hushyorlikka va qoidalarga qat’iy amal qilishga chaqirdi.