Namangan viloyatida bolalar hayotini xavf ostida qoldirgan yo‘l-transport holati jamoatchilikning keskin e’tiroziga sabab bo‘ldi. 15 dekabr kuni ijtimoiy tarmoqlarda tarqalgan videolarda Damas rusumli avtomashina piyodalar o‘tish yo‘lagidan o‘tayotgan bolalarga yo‘l bermagani aks etgan.
Mazkur holat yuzasidan viloyat Yo‘l harakati xavfsizligi boshqarmasi tomonidan tezkor surishtiruv o‘tkazildi. Natijada Damas avtomashinasi jarima maydoniga joylashtirilib, haydovchiga qonunchilikka muvofiq ma’muriy bayonnoma tuzildi.
Tekshiruv davomida xavfli vaziyat yuzaga kelishida Spark rusumli avtomashinaning piyodalar o‘tish joyi oldida qoidabuzarlik bilan to‘xtab qoldirilgani ham aniqlandi. Bu holat Damas haydovchisining yo‘lni to‘liq ko‘rishiga jiddiy to‘sqinlik qilgan.
Har ikki haydovchi ham sodir bo‘lgan holatdan afsusda ekanini bildirib, bundan buyon yo‘l harakati qoidalariga qat’iy amal qilishga va’da berdi.
Qonunga muvofiq, Damas haydovchisiga Ma’muriy javobgarlik to‘g‘risidagi kodeksning 128-moddasi, Spark haydovchisiga esa 128-6-moddasi asosida ma’muriy javobgarlik choralari qo‘llanildi.
Yo‘lda bir lahzalik bee’tiborlik og‘ir oqibatlarga olib kelishi mumkin. Shu bois haydovchilardan, ayniqsa piyodalar o‘tish joylarida, maksimal darajada hushyor bo‘lish talab etiladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
