Taqiqlangan moddalarni noqonuniy olib kirish toʻxtatildi. Bu haqda Upl.uz xabar beradi.
Oʻzbekiston bojxona organlari tomonidan kuchli taʼsir qiluvchi "sibutramin" moddasi olib kirilishining oldini olishga qaratilgan bir qator tadbirlar oʻtkazildi. Xususan, Toshkent shahridagi Islom Karimov nomidagi xalqaro aeroportda "Istanbul-Toshkent" reysi yoʻlovchisi "yashil" yoʻlak orqali umumiy qiymati 33 million soʻmlik, 2 000 qadoqdan iborat vazn yoʻqotish uchun moʻljallangan qahvani olib oʻtishga uringan.
Ekspertiza natijalariga koʻra, ushbu qahva tarkibida "sibutramin" moddasi aniqlangan, ammo qadoqda bu haqda hech qanday maʼlumot koʻrsatilmagan. Shuningdek, "Fargʻona" chegara bojxona postida yana bir fuqaro qiymati 7,2 million soʻmlik, 360 dona vazn yoʻqotish uchun qahvani olib kirishga uringan.
Ushbu mahsulot tarkibida ham "sibutramin" moddasi aniqlangan. Bojxona qoʻmitasi maʼlumotiga koʻra, "sibutramin" Oʻzbekistonda alohida kuchli taʼsir qiluvchi moddalar roʻyxatiga kiritilgan boʻlib, hatto 0,5 gramm miqdorida ushbu moddaning mavjudligi jinoiy javobgarlikka olib keladi.
Markaziy bojxona laboratoriyasi hozirga qadar tarkibida "sibutramin" va "topentatol" kabi kuchli moddalar boʻlgan 39 xil savdo markasidagi mahsulotlarning noqonuniy olib kirilish holatlarini aniqlagan. Joriy yil davomida mamlakatimiz bojxona xodimlari tomonidan 1,1 tonnadan ortiq psixotrop va kuchli taʼsir qiluvchi moddalarni noqonuniy olib oʻtishning oldi olingan.
Bu koʻrsatkich oʻtgan yilning shu davriga nisbatan 3,6 barobar koʻpdir.
Mehmon guruhidagi foydalanuvchilar ushbu nashrga izoh qoldira olmaydi.
