Oliy Majlis va xalqga yoʻllangan navbatdagi murojaatda prezident Shavkat Mirziyoyev oʻrta maxsus taʼlim tizimini tubdan yangilash rejasini ochiqladi. Davlat rahbari yoshlar shunchaki kasb egallab qolmasdan, xalqaro mehnat bozorida raqobatchilardan bir qadam oldinda yurishi kerakligini taʼkidladi. Bu haqda upl.uz xabar beradi.
Islohotning asosiy “drayveri” sifatida texnikumlarni kapital taʼmirlash va zamonaviy jihozlar bilan qayta qurollantirish dasturi ishga tushiriladi. 2026 yildan boshlab har yili respublika boʻylab kamida 100 ta texnikumning moddiy-texnik bazasi yangilanadi: gap faqat bino taʼmiri haqida emas, balki sinflarni sanoat va servis talablari darajasidagi uskunalar bilan toʻliq taʼminlash haqida ketmoqda.
Infratuzilma bilan birga taʼlim mazmuni ham kuchaytiriladi. Rejaga koʻra, Germaniya, Shveysariya, Buyuk Britaniya, Xitoy va Janubiy Koreyaning ilgʻor standartlarini oʻquv dasturlariga qoʻshgan texnikumlar soni ham 100 taga yetkaziladi. Natijada bitiruvchilar xalqaro darajada eʼtirof etiladigan ko‘nikmalar va diplomlarga yaqinlashadi.
Hududlar kesimida ham yangi model joriy etiladi: kelasi yildan Oʻzbekistonning 7 ta viloyatida, 2027 yilga borib qolgan barcha hududlarda “ilgʻor kasbiy mahorat texnikumlari” hamda “Kasblar shaharchalari” ish boshlaydi. Ilgʻor texnikumlar metodik markaz bo‘lib, tajribani hududdagi boshqa oʻquv yurtlariga uzatadi, “Kasblar shaharchalari” esa maktab o‘quvchilarini erta kasbga yo‘naltirib, qurilish, qishloq xoʻjaligi, “yashil” energetika, transport va xizmat ko‘rsatish yo‘nalishlarida tanlov qilishiga yordam beradi.
Murojaatda “taʼlim – biznes” bogʻliqligi alohida urgʻu bilan qayd etildi. Kadr tayyorlashda ishtirok etayotgan ish beruvchilarni ragʻbatlantirish uchun dual taʼlim modelini yoʻlga qoʻygan korxonalarga 7 yil muddatga 5 milliard soʻmgacha imtiyozli kreditlar berilishi ko‘zda tutilgan, shuningdek ularga tadbirkorlik barqarorligi reytingida qoʻshimcha 5 ball qoʻshiladi.
Soliq yengilliklari ham davom etadi: texnikum bitiruvchilari hamkor korxonalarga ishga joylashsa, ular uchun ijtimoiy soliq bo‘yicha 1 foizlik imtiyoz yana uch yilga uzaytiriladi.
Talabalar uchun ijtimoiy qoʻllab-quvvatlash ham yangi bosqichga chiqadi. 2026 yildan boshlab 100 ming nafar texnikum talabasi stipendiya bilan qamrab olinadi — bunday ko‘lamdagi tizim avval amalda bo‘lmagan. Oʻqishda yuqori natija ko‘rsatib, kasbiy ko‘nikmalarni chuqur oʻzlashtirayotganlarga oshirilgan toʻlovlar ham beriladi.
Dual taʼlim tizimi (nazariya sinfda, amaliyot esa ishlab chiqarishda) dunyo tajribasida Germaniyada hunarmandlar tsex tizimi davridayoq shakllangan, biroq rasmiy huquqiy asos 1969 yilda Germaniyada kasbiy taʼlim toʻgʻrisidagi qonun (BBiG) orqali mustahkamlangan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
