Samarqandda tug‘ruqxona yonida tashlab ketilgan chaqaloq o‘lik topildi

Samarqand viloyatining Payariq tumanida og‘ir va jamoatchilikni larzaga solgan holat qayd etildi. Xabarlarga ko‘ra, bir ayol tug‘ruqxona oldida chaqaloqni dunyoga keltirib, uni hojatxonadagi chiqindi qutisiga tashlab ketgan.

Manbada aytilishicha, voqea Yangi yil bayrami arafasida sodir bo‘lgan. Kelinchak Payariq tumani tug‘ruq bo‘limiga murojaat qilib, shifokorlardan homilasini tushirish masalasida yordam so‘ragan. Biroq u qoniqarli javob ololmagan. Shundan so‘ng, ayol chaqaloqni tug‘ruqxona yonida tug‘ib, hojatxona chiqindisiga tashlab ketgani ma’lum qilinmoqda.

Holat kuzatuv kameralari orqali aniqlanib, tegishli xizmatlar tomonidan tekshiruv ishlari boshlangan. Chaqaloq esa o‘lik holda topilgan.

Samarqand viloyati IIB axborot xizmati ma’lumotiga ko‘ra, ayni paytda voqea yuzasidan ekspertiza tayinlangan. Unda bola tirik tug‘ilganmi yoki homila avvaldan nobud bo‘lgan holda tug‘ilganmi — shu masalaga aniqlik kiritiladi. Ekspertiza xulosasidan keyin jinoyat ishi masalasi bo‘yicha qaror qabul qilinishi bildirilgan.

Huquq-tartibot idoralari qo‘shimcha ma’lumot ekspertiza natijalari e’lon qilingach taqdim etilishini qayd etgan.

Bu voqea — jamiyat uchun ham, har bir oila uchun ham qattiq o‘ylantiradigan signal. Bunday vaziyatda qolgan ayollarni o‘z vaqtida tibbiy va psixologik yordamga yo‘naltirish, mas’ul idoralar bilan ochiq ishlash esa keyingi fojialarning oldini olishda hal qiluvchi ahamiyatga ega.