Andijon viloyati Izboskan tumanidagi 11-maktabda sodir bo‘lgan holat jamoatchilik e’tiborini tortdi. Ijtimoiy tarmoqlarda tarqalgan videolavhada maktab rahbariyati vakili o‘quvchiga nisbatan jismoniy zo‘ravonlik qo‘llayotgani aks etgan.
Ma’lum bo‘lishicha, bolani tayoq bilan urgan shaxs ushbu ta’lim muassasasining direktor o‘rinbosari bo‘lgan. Holat 23-yanvar kuni soat 10:00 atrofida, o‘quvchilarni darsga kiritish paytida maktab hududida sodir etilgan.
Maktabgacha va maktab ta’lim vazirligi axborotiga ko‘ra, pedagogik etika va o‘quvchi huquqlariga mutlaqo zid bo‘lgan bu harakat uchun direktor o‘rinbosariga hayfsan tarzida intizomiy jazo qo‘llangan. Shu bilan birga, vazirlik tomonidan mazkur holat yuzasidan qo‘shimcha o‘rganish ishlari davom ettirilmoqda.
Qayd etilishicha, videoda rahbar o‘rinbosari o‘quvchiga qo‘pol muomala qilib, uni kaltaklayotgani ochiq-oydin ko‘rinadi. Bu esa ta’lim muassasalarida bolalar xavfsizligi masalasini yanada kun tartibiga chiqardi.
So‘nggi paytlarda mamlakatning turli hududlarida ta’lim sohasida zo‘ravonlik bilan bog‘liq holatlar ko‘payib borayotgani jamoatchilikda jiddiy tashvish uyg‘otmoqda. Mas’ul idoralar bunday holatlarga nisbatan qat’iy choralar ko‘rilishini ta’kidlamoqda.
“Zamin”ni Telegramʻda oʻqing!
