Ijtimoiy tarmoqlarda Toshkentdagi holat aks etgan video tarqaldi: unda bir yigit chet el fuqarosiga nosvoy chekishni taklif qilayotgani aytiladi. Videodagi epizod jamoatchilik orasida muhokamalarga sabab bo‘lgach, Toshkent shahar Ichki ishlar bosh boshqarmasi ushbu holat bo‘yicha tekshiruv o‘tkazdi.
Tekshiruv natijalariga ko‘ra, voqea joriy yil 25 yanvar kuni Chilonzor tumanida joylashgan istirohat bog‘laridan birida sodir bo‘lgan. 2006 yilda tug‘ilgan M.K. chet el fuqarosiga nosvoy taklif qilgani, shuningdek, haqoratomuz so‘zlar ishlatib, jamoat joyida yurish-turish qoidalarini qasddan buzganligi ma’lum qilindi.
Mazkur holat yuzasidan Chilonzor tumani IIO FMB tomonidan M.K. ga nisbatan Ma’muriy javobgarlik to‘g‘risidagi kodeksning 183-moddasi — “mayda bezorilik” bilan ma’muriy bayonnoma rasmiylashtirilgan. To‘plangan materiallar qonuniy chora ko‘rish uchun jinoyat ishlari bo‘yicha tuman sudiga yuborilgan.
Qayd etilishicha, ichki ishlar organlari ijtimoiy tarmoqlarda tarqalayotgan bunday holatlar bo‘yicha tekshiruvlarni davom ettiradi va jamoat tartibini buzganlarga nisbatan qonun doirasida chora ko‘riladi.
“Zamin”ni Telegramʻda oʻqing!
