Prezident Shavkat Mirziyoyevning Pokistonga davlat tashrifi doirasidagi tadbirlar davom etmoqda. Ushbu dasturning navbatdagi muhim voqeasi 5 fevral kuni Islomobod shahrida bo‘lib o‘tdi: poytaxt ko‘chalaridan biriga “Toshkent” nomi berildi, shuningdek, yangidan barpo etiladigan yangi bog‘ga buyuk ajdodimiz Zahiriddin Muhammad Bobur nomi qo‘yilishiga bag‘ishlangan marosim tashkil etildi.
Marosimda Pokiston bosh vaziri Shahboz Sharif bu qaror ikki davlat o‘rtasidagi yaqin tarixiy-ma’naviy bog‘liqlikni, umumiy madaniy merosni va xalqlar o‘rtasidagi qadrdon munosabatlarni yorqin aks ettirishini ta’kidladi. Uning so‘zlariga ko‘ra, Islomobodda “Toshkent” nomli ko‘chaning paydo bo‘lishi va Bobur nomi bilan ataladigan yangi bog‘ning barpo etilishi O‘zbekiston – Pokiston ko‘p qirrali hamkorligi strategik bosqichga ko‘tarilganini yana bir bor tasdiqlaydi.
Ayniqsa, Bobur nomi ramziy ma’noga ega. Chunki Zahiriddin Muhammad Bobur tarixiy jihatdan ikki xalqni ma’naviy jihatdan bog‘lab turuvchi ulug‘ shaxs sifatida e’tirof etiladi. Shu bois, uning nomi bilan ataladigan bog‘ — shunchaki yashil hudud emas, balki o‘zaro hurmat, do‘stlik va mehr-oqibat rishtalari yanada mustahkamlanishiga bo‘lgan qat’iy intilishning yorqin belgisi sifatida qaralmoqda.
Qisqasi, Islomoboddagi “Toshkent” ko‘chasi va Bobur bog‘i — bu ikki mamlakat munosabatlari qog‘ozda emas, hayotning o‘zida mustahkamlanayotganining jonli isboti. Bugun nom berildi, ertaga esa shu nomlar ortidagi do‘stlik yanada kattaroq ishlarga aylanishi kutilmoqda.
“Zamin”ni Telegramʻda oʻqing!
