Qatarda sodir bo‘lgan yo‘l-transport hodisasi oqibatida O‘zbekiston fuqarosi bo‘lgan 11 yoshli bola halok bo‘ldi. Bu haqda “Dunyo” axborot agentligi xabar qildi.
Ma’lumotlarga ko‘ra, Toshkent shahrida tug‘ilgan 11 yoshli M.A. Qatardagi safari davomida YTHga uchragan. Hodisa avtotransport vositasi boshqaruvi yo‘qotilgani ortidan yuz bergani, bola esa bosh qismidan olgan og‘ir tan jarohatlari sabab voqea joyida vafot etgani qayd etilmoqda.
Xabar kelib tushishi bilan O‘zbekistonning diplomatik vakolatxonasi Qatarning tegishli davlat idoralari bilan hamkorlikda marhumning dafn marosimini tashkil etishda amaliy yordam ko‘rsatgan.
Manbada ta’kidlanishicha, mintaqadagi mavjud vaziyat hamda transport-logistika bilan bog‘liq cheklovlar inobatga olingan. Shuningdek, oilaning roziligi asosida marhumning jasadi barcha milliy va diniy an’analarga muvofiq ravishda Qatarda dafn etilgan.
Eslatib o‘tamiz, fevral oyining boshlarida Nyu-York shahrida ham 11 yoshli o‘zbekistonlik qiz YTH oqibatida halok bo‘lgan edi. U chorrahani piyodalar yo‘lagidan kesib o‘tayotgan vaqtida maktab avtobusi urib yuborgani xabar qilingan.
“Zamin”ni Telegramʻda oʻqing!
