Mamlakatimizda korrupsiyaga qarshi kurashish doirasida huquqni muhofaza qiluvchi organlar tomonidan navbatdagi tezkor tadbirlar o'tkazildi. Natijada Samarqand va Surxondaryo viloyatlarida mansab vakolatini suiiste'mol qilgan shaxslarning noqonuniy harakatlariga chek qo'yildi.
Xususan, Samarqand viloyati Pastdarg'om tumanida Davlat kadastrlari palatasi filiali muhandisi o'z tanishlari orqali fuqaroning 2 sotix yer maydonini davlat ro'yxatidan o'tkazib berishni va'da qilgan. U ushbu xizmati evaziga 2,5 ming AQSH dollarini olayotgan vaqtida DXX va Departament xodimlari tomonidan ashyoviy dalillar bilan qo'lga olindi.
Shuningdek, Surxondaryo viloyatining Sherobod tumanida ham shunga o'xshash holat qayd etildi. Davlat soliq inspeksiyasining sobiq bosh inspektori fermer xo'jaligining egalik huquqini sud orqali tiklab berishni va'da qilib, fuqarodan 10 million so'm talab qilgan. U pul mablag'larini olayotgan paytda huquqni muhofaza qiluvchi organlar xodimlari tomonidan ushlandi.
Hozirgi kunda har ikkala holat yuzasidan Jinoyat kodeksining tegishli moddalari bilan jinoyat ishlari qo'zg'atilib, tergov harakatlari olib borilmoqda. Huquqni muhofaza qiluvchi organlar fuqarolarni bunday noqonuniy takliflarga aldanib qolmaslikka va korrupsiya holatlariga duch kelganda zudlik bilan xabar berishga chaqirmoqda.
“Zamin”ni Telegramʻda oʻqing!
