Surxondaryo viloyatining Sariosiyo tumanida o‘tkazilgan tezkor tadbirda maktab o‘qituvchisi sifatida faoliyat yuritib kelgan shaxs yirik miqdordagi narkotik moddani sotayotgan paytda qo‘lga olindi. Bu haqda Davlat xavfsizlik xizmati matbuot xizmati ma’lum qildi.
Bildirilishicha, 1984 yilda tug‘ilgan fuqaro umumiy o‘rta ta’lim maktablaridan birida ishlagan. U avval Tojikistondan narkokuryerlar orqali olib kirilgan 14 kilogramm 680 gramm opiy moddasini shartli xaridorga 180 ming AQSH dollariga sotayotgan vaqtida ashyoviy dalillar bilan ushlangan.
Mazkur holat yuzasidan unga nisbatan Jinoyat kodeksining 273 moddasi 5 qismi bilan jinoyat ishi qo‘zg‘atilgan. Tergov davrida unga nisbatan qamoq ehtiyot chorasi qo‘llangan.
Ayni paytda ushbu noqonuniy savdoga aloqador bo‘lgan boshqa shaxslarni aniqlash bo‘yicha tezkor-surishtiruv ishlari davom ettirilmoqda. huquqni muhofaza qiluvchi idoralar jinoiy tarmoqning boshqa ishtirokchilarini ham aniqlash choralarini ko‘rmoqda.
“Zamin”ni Telegramʻda oʻqing!
