Farg‘ona viloyatining O‘zbekiston tumanida xizmat vazifasini bajarayotgan suv ta’minoti xodimiga hujum qilingani haqida xabarlar tarqaldi. Mazkur holat yuzasidan jinoyat ishi qo‘zg‘atilgani ma’lum qilindi.
Ma’lumotlarga ko‘ra, 9 mart kuni “Farg‘ona suv ta’minoti” MCHJning O‘zbekiston tumani filiali inspektori D.S. tumandagi Sochtepa ko‘chasida joylashgan xonadonlardan biriga tekshiruv uchun borgan. Tekshiruv jarayonida ushbu uyda ro‘yxatdan o‘tkazilmagan suv hisoblagichi borligi aniqlangan.
Holat yuzasidan tegishli hujjatlar rasmiylashtirilayotgani va jarima qo‘llanishi haqida ma’lum qilingan paytda xonadon egasi Fazliddin Pardayev inspektorga qarshilik ko‘rsatib, janjal chiqargan. Mojaro vaqtida u o‘sha yerda bo‘lgan yog‘och bo‘lagi bilan inspektorning bosh qismiga urib, unga tan jarohati yetkazgan.
Mazkur holat yuzasidan Jinoyat kodeksining 219 moddasi 2 qismi — hokimiyat vakiliga yoki fuqaroviy burchini bajarayotgan shaxsga qarshilik ko‘rsatish bo‘yicha jinoyat ishi qo‘zg‘atilgan. Gumonlanuvchi F.Pardayev protsessual tartibda ushlangan.
Hozirda mazkur ish yuzasidan prokuratura organlari tomonidan tergov harakatlari olib borilmoqda.
“Zamin”ni Telegramʻda oʻqing!
