Davlat xavfsizlik xizmati xodimlari tomonidan o‘tkazilgan tezkor tadbirda yirik miqdorda sintetik narkotik modda olib yurilayotgani aniqlandi. Ma’lum qilinishicha, oldindan kuzatuvga olingan 21 yoshli fuqaro boshqaruvidagi "Nexia-3" avtomobili poytaxtning Chilonzor tumanida joylashgan "Erkin" YPX maskanida to‘xtatilib, tekshiruvdan o‘tkazilgan.
Ko‘zdan kechirish jarayonida avtomobil salonidan sof og‘irligi 4 kilogramm 811 gramm bo‘lgan "Alfa-PVP" nomli sintetik narkotik modda topilib, ashyoviy dalil sifatida rasmiylashtirilgan.
Ushbu holat yuzasidan DXX Tergov boshqarmasi tomonidan gumonlanuvchiga nisbatan Jinoyat kodeksining 246 va 273-moddalari tegishli bandlari bilan jinoyat ishi qo‘zg‘atilib, unga "qamoq" ehtiyot chorasi qo‘llanilgan.
Shu bilan birga, yana bir holat Andijon viloyatida qayd etildi. DXX chegara qo‘shinlari harbiy xizmatchilari Marhamat tumanida o‘tkazgan tezkor tadbir davomida Boboxuroson MFY hududida ikki nafar mahalliy fuqaroni ushladi. Ular qirg‘izistonlik shaxs tomonidan chegara to‘siqlari orqali uloqtirilgan qutini qabul qilib olayotgan paytda qo‘lga tushgan.
Tekshiruv davomida quti ichida 9 ming 988 dona "Zardeks" nomli kuchli ta’sir qiluvchi dori vositalari borligi ma’lum bo‘ldi. Mazkur holat yuzasidan Jinoyat kodeksining 246-moddasi 1-qismi bilan jinoyat ishi qo‘zg‘atilib, gumonlanuvchilarga nisbatan qamoq ehtiyot chorasi qo‘llandi. Hozirda tergov harakatlari davom ettirilmoqda.
“Zamin”ni Telegramʻda oʻqing!
