Toshkent viloyatining Toshkent tumanida huquqni muhofaza qiluvchi organlar tomonidan o‘tkazilgan tezkor tadbir natijasida noqonuniy dori vositalari saqlangan yashirin ombor fosh etildi.
Davlat xavfsizlik xizmati hamda bojxona organlari hamkorligida amalga oshirilgan ushbu operatsiya davomida bir nechta yo‘nalishlarda nazorat kuchaytirilgani maʼlum bo‘ldi. Tekshiruvlar natijasida 1991 yilda tug‘ilgan, ushbu hududda yashovchi shaxs o‘z xonadonini noqonuniy ombor sifatida foydalanib kelgani aniqlangan.
Maʼlum bo‘lishicha, u xorijdan noqonuniy yo‘llar bilan olib kirilgan dori vositalarini yashirin tarzda saqlab, keyinchalik poytaxtdagi ayrim dorixonalarga sotish bilan shug‘ullanib kelgan. Bu orqali u noqonuniy daromad manbai shakllantirgani qayd etilmoqda.
Omborxona to‘liq ko‘zdan kechirilganda, umumiy hisobda 119 turdagi dori vositalari mavjudligi aniqlangan. Ular 3 356 qutiga joylashtirilgan bo‘lib, jami 76 318 dona tibbiy mahsulotni tashkil etgan. Ular orasida “Frotu”, “Budenofalk”, “Gaviscon”, “Baraclude” va boshqa turdagi preparatlar ham borligi maʼlum qilindi.
Mutaxassislarning dastlabki hisob-kitoblariga ko‘ra, ushbu dorilarning umumiy qiymati taxminan 1 milliard so‘m atrofida baholanmoqda. Barcha mahsulotlar protsessual tartibda hujjatlashtirib olingan.
Hozirda barcha dorilardan namunalar olinib, ularning sifat va xavfsizligini aniqlash maqsadida Farmatsevtika mahsulotlari xavfsizligi markaziga laboratoriya tekshiruvi uchun yuborilgan.
Huquqni muhofaza qiluvchi organlar tomonidan hodisa bo‘yicha dastlabki tergovga qadar tekshiruv ishlari davom ettirilmoqda. Mutaxassislar bu kabi holatlar aholi salomatligiga jiddiy xavf tug‘dirishini taʼkidlashmoqda.
“Zamin”ni Telegramʻda oʻqing!
