Foto: Bojxona qo‘mitasi
Poytaxtdagi Toshkent xalqaro aeroporti hududida yirik hajmdagi giyohvand moddani noqonuniy ravishda olib kirishga urinish qayd etildi. Davlat bojxona qo‘mitasi maʼlumotiga ko‘ra, xorijiy yo‘lovchi 6,3 kg atrofidagi “marixuana”ni mamlakatga olib kirishga harakat qilgan holda to‘xtatib qolingan.
“Toshkent-Aero” IBKning chegara bojxona posti xodimlari Bangkokdan yetib kelgan yo‘lovchilardan birining qo‘l yuki va bagajini chuqur tekshiruvdan o‘tkazgan. Nazorat jarayonida turli qadoqlar ichiga yashirilgan 12 dona polietilen o‘ram aniqlangan.
Belgilangan tartibda, xolislar ishtirokida o‘ramlar ochib ko‘rilganda, ularning ichidagi yashil rangli, o‘tkir hidga ega modda Markaziy bojxona laboratoriyasi xulosasiga ko‘ra, 6,3 kilogrammdan ziyod quritilgan marixuana ekanligi tasdiqlangan.
Maʼlum qilinishicha, ushbu modda O‘zbekiston hududida muomalasi qatʼiyan taqiqlangan giyohvandlik vositalari qatoriga kiradi. Holat yuzasidan bojxona organlari tomonidan jinoyat ishi qo‘zg‘atilgan.
Shu bilan birga, “Toshkent-Aero” IBK tezkor bo‘linmalari joriy yilning dastlabki choragida ham faol ish olib borgani qayd etildi. Ushbu davrda 15 ta holatda qariyb 30 kg giyohvand moddalar, jumladan sintetik narkotiklarning noqonuniy olib o‘tilishiga chek qo‘yilgan.
Qayd etilishicha, musodara qilingan giyohvandlik vositalari o‘tgan yilning shu davriga nisbatan 18 kilogrammga ko‘paygani xavotirli tendensiya sifatida baholanmoqda.
“Zamin”ni Telegramʻda oʻqing!
