Bank oldidagi majburiyatini bajarmaganligi uchun bino sotuvga qo‘yildi
Bog‘ot tumanidagi “Ashxobod Bog‘ot” MCHJ bank oldidagi 2,5 mlrd so‘mlik kredit majburiyatini bajarmaganligi sababli sud qarori bilan mulki sotuvga qo‘yildi. Qarzdorlik qoplanmagani bois, garovga qo‘yilgan “mahalla go‘zari” binosi va inshootlari xatlangan. Mazkur mol-mulk 3,1 mlrd so‘m boshlang‘ich narxda “E-AUKSION” maydonchasi orqali sotuvga chiqarildi. Sotuvdan tushgan mablag‘lar yordamida bank qarzi qoplanadi.
Bog‘ot tumanlararo iqtisodiy sudining ijro varaqasiga asosan qarzdor “Ashxobod Bog‘ot” MCHJdan undiruvchi bank foydasiga jami 2,5 mlrd. so‘m undirish va undiruv garovga qo‘yilgan sherik javobgar boshqa MCHJga qarashli umumiy yer maydoni 3000,0 kv. metr, qurilish osti maydoni 648,27 kv. metr va foydali maydoni 616,75 kv. metr bo‘lgan Bog‘ot tumani hududida joylashgan “mahalla guzari” binosi va inshootlariga qaratish haqidagi ijro hujjati Byuroning Xorazm viloyati boshqarmasi ish yurituviga kelib tushgan va ijro harakatlariga kirishilgan.
Davlat ijrochisi S.Qlichev tomonidan jamiyat rahbariga qarzdorlik ixtiyoriy berilgan muddat davomida bartaraf etilmasa, garovga qo‘yilgan bino va inshootlar xatlanib, elektron onlayn savdosiga chiqarilishi va savdodan tushgan pul evaziga qarzdorlikni qoplash choralari ko‘rilishi tushuntirilgan.
Olib borilgan ijro harakatlari jarayonida qarzdor tomonidan bank oldidagi kredit majburiyatlari bajarilmaganligi sababli, garov mulki hisoblangan “mahalla guzari” binolari va inshootlari xatlanib, 3,1 mlrd. so‘mda belgilangan tartibda elektron onlayn-auksionlarni tashkil etish markazi orqali “E-AUKSION” yagona elektron savdo maydonchasida sotish uchun savdoga chiqarildi.
Izohlar 0
…