Jizzax viloyatining Mirzacho‘l tumanida Favqulodda vaziyatlar bo‘limi boshlig‘i o‘rinbosari umumiy ovqatlanish maskanida o‘tkazilgan tekshiruv davomida aniqlangan kamchiliklar bo‘yicha maʼmuriy bayonnoma rasmiylashtirgan.
Maʼlumotlarga ko‘ra, u ushbu holatni “yopib yuborish” hamda hujjatlarni sudga yo‘llamaslik evaziga 3 million so‘m talab qilgan. Bu orqali u rasmiy jarayonni suiisteʼmol qilishga uringani aytiladi.
Tezkor tadbir Davlat xavfsizlik xizmati hamda Bosh prokuratura huzuridagi Departament xodimlari hamkorligida o‘tkazilgan. Mansabdor shaxs pulni umumiy ovqatlanish maskani rahbaridan olayotgan vaqtda qo‘lga olingan.
Holat yuzasidan unga nisbatan jinoyat ishi qo‘zg‘atilgan va hozirda dastlabki tergov harakatlari davom etmoqda.
Rasmiylar fuqarolarga bunday holatlarga duch kelganda 1520 qisqa raqamiga murojaat qilish mumkinligini eslatib o‘tdi. Shuningdek, murojaat qiluvchilarning shaxsiy maʼlumotlari maxfiy saqlanishi kafolatlangani taʼkidlandi.
“Zamin”ni Telegramʻda oʻqing!
