O‘zbekistonda chorva salomatligi oyligi boshlandi
O'zbekistonda 18-apreldan 18-maygacha "Chorvachilikda sanitariya-epidemiologik va gigiyena oyligi" boshlandi. Bu tadbir chorva hayvonlari salomatligini himoya qilish va xavfli yuqumli kasalliklarning oldini olishga qaratilgan. Jahon hayvonlar salomatligi tashkiloti ma'lumotlariga ko'ra, yangi "SAT" turdagi kasalliklar aniqlangan va mavjud vaktsinalar barcha shtammlarga to'liq immunitet bermaydi. Fermerlar va chorvadorlarga veterinar-sanitariya qoidalariga qat'iy rioya qilish, dezinfeksiya vositalarini qo'llash va nazoratni kuchaytirish tavsiya etiladi. Kasallikka shubha tug'ilganda, darhol veterinarga murojaat qilish hamda vaktsinatsiya choralarini ko'rish muhimligi ta'kidlangan.
2026 yil 18 apreldan 18 mayga qadar O‘zbekiston hududida “chorvachilikda sanitariya-epidemiologik va gigiyena oyligi” eʼlon qilindi. Bu haqda O‘zbekiston Respublikasi Qishloq xo‘jaligi vazirligi rasman maʼlum qildi. Tadbir asosiy maqsadi — chorva hayvonlari sog‘ligini muhofaza qilish va xavfli yuqumli kasalliklar tarqalishining oldini olishdan iborat.
Jahon hayvonlar sog‘ligi tashkiloti maʼlumotlariga ko‘ra, 2025–2026 yillar davomida 48 ta davlatda ushbu kasallikning yangi “SAT” turlari aniqlangan. Shu bilan birga, amaldagi vaksinalar barcha shtammlarga to‘liq immunitet bermasligi ham qayd etilmoqda.
Qishloq xo‘jaligi vazirligi fermerlar va chorvadorlarga veterinariya-sanitariya qoidalariga qatʼiy rioya qilishni tavsiya etmoqda. Xo‘jaliklarga kirish joylarida dezinfeksiya vositalarini joriy etish va nazorat tizimini kuchaytirish alohida talab sifatida belgilangan.
Shuningdek, begona shaxslar hamda transport vositalarining kirishini cheklash, hayvonlarni toza suv va sifatli ozuqa bilan taʼminlash muhim ekanligi taʼkidlangan. Xo‘jalik hududlarida doimiy tozalikni saqlash va zararkunanda hasharotlarga qarshi kurashish ham asosiy choralar qatoriga kiradi.
Kasallikka shubha paydo bo‘lganda, hayvonlar darhol alohida joyga ajratilishi va mustaqil davolash choralari qo‘llanmasligi kerak. Barcha holatlarda tezkor ravishda veterinar mutaxassislarga murojaat qilish shartligi aytilmoqda.
Oqsil kasalligi belgilari sifatida yuqori harorat, og‘iz bo‘shlig‘ida va tuyoqlarda yaralar, shuningdek yelin sohasida shikastlanishlar kuzatiladi. Bunday holatlarda binolarni to‘liq dezinfeksiya qilish va mahsulotlarni tarqatmaslik talab etiladi.
Mutaxassislar vaksinatsiyani eng samarali profilaktik chora sifatida baholashmoqda. Qoramollar yiliga ikki marta, qo‘y va echkilar esa bir marta emlanishi kerak. Immunitet odatda emlashdan 15–21 kun o‘tib shakllanadi.
Vazirlik fermerlarni doimiy ehtiyotkorlikka chaqirib, har qanday shubhali holatda darhol mutaxassislarga murojaat qilish zarurligini taʼkidlamoqda. Qoidalarga rioya qilish va tozalikni saqlash — sog‘lom chorva hamda barqaror daromadning asosiy kafolati ekani qayd etildi.
Izohlar 0
…