Majburiy ijro byurosi Yangibozor tumani boʻlimi tomonidan davlat manfaatlari va korxonalar haqdorligini taʼminlash borasida tizimli ishlar amalga oshirilmoqda.
Xususan, boʻlim davlat ijrochisi A.Qadirberganov tomonidan olib borilgan ijro harakatlari natijasida yirik miqdordagi qarzdorlik bartaraf etildi.
Sud va soliq organining ijro hujjatlariga koʻra, tumandagi “O.S.” fermer xoʻjaligining jami 244,7 million soʻmdan ortiq qarzdorligi mavjud boʻlib, ushbu mablagʻning 158,4 mln soʻmi davlat foydasiga soliq qarzdorligi hamda 86,3 mln soʻmi “Hududiy elektr tarmoqlari” AJ oldidagi qarz ekanligi qayd etilgan.
Qarzdorlik oʻz vaqtida toʻlanmaganligi sababli, davlat ijrochisi tomonidan qatʼiy choralar koʻrildi. Fermer xoʻjaligiga tegishli boʻlgan, Yangibozor tumani “Choʻpolonchi” massivida joylashgan jami 65,6 gektar yer maydonining uzoq muddatli ijaraga olish huquqi xatlandi.
Mazkur yer maydonining normativ qiymati tegishli mutaxassislar tomonidan 1,8 milliard soʻmdan ziyod deb baholandi va Oʻzbekiston Respublikasi Prezidentining 28.03.2025 yildagi PQ-131-sonli qarori ijrosi boʻyicha joriy yilning 15 aprel kuni “E-AUKSION” elektron savdo maydonchasiga chiqarildi.
Fermer xoʻjalik rahbari yer maydonidan ayrilishini oʻylab, barcha qarzdorlikni toʻliq bartaraf etdi. Qarzdorlik toʻlangani munosabati bilan ijro ishi amalda tamomlandi va yer maydoniga qoʻyilgan cheklovlar bekor qilindi.
Ijro hujjatlari talablarini oʻz vaqtida bajarish, mol-mulklaringiz xatlanishi va auktsion savdolariga chiqib ketishining oldini oladi.
“Zamin”ni Telegramʻda oʻqing!
