Oʻzbekiston boʻylab “Mustaqillik toʻyi” festivali keng nishonlanadi
O‘zbekiston mustaqilligining 35 yilligi munosabati bilan joriy yilning may oyidan sentyabrgacha mamlakat bo‘ylab “Mustaqillik to‘yi” festivali o‘tkaziladi. “Yagona Vatan, yagona xalq bo‘lib, yangi hayot va kelajak yaratamiz!” shiori ostidagi ushbu tadbir xalq orasida birdamlik va vatanparvarlik tuyg‘ularini mustahkamlashga qaratilgan. Festival doirasida o‘ndan ortiq ijtimoiy-madaniy loyihalar amalga oshirilib, ular barcha hududlardagi aholi qatlamlarini, ayniqsa yoshlarni qamrab oladi. Mazkur tashabbus davlat va jamoat tashkilotlari hamkorligida jamiyatda milliy qadriyatlar va yangi g‘oyalarni keng targ‘ib qilishga xizmat qiladi.
Yurtimizda davlat mustaqilligining 35 yilligi munosabati bilan yirik madaniy-maʼrifiy loyiha — «Mustaqillik toʻyi» festivali oʻtkazilishi rejalashtirilmoqda. Mazkur keng qamrovli tadbir joriy yilning may oyidan sentyabr oyigacha mamlakatimizning barcha hududlarini qamrab oladi.
Festival «Yagona Vatan, yagona xalq boʻlib, yangi hayot va kelajak yaratamiz!» shiori ostida tashkil etilib, yurtdoshlar oʻrtasida birdamlik, vatanparvarlik va milliy qadriyatlarga hurmat tuygʻularini mustahkamlashga qaratilgan.
Ushbu madaniy-maʼrifiy tashabbus Respublika Maʼnaviyat va maʼrifat markazi, Oʻzbekiston Mahallalari uyushmasi, Madaniyat vazirligi, Yoshlar ishlari agentligi, «Maʼrifat» targʻibotchilar jamiyati hamda boshqa qator davlat va jamoat tashkilotlari hamkorligida amalga oshiriladi.
Festival doirasida oʻndan ortiq ijtimoiy, maʼnaviy va madaniy loyihalar hayotga tatbiq etilishi koʻzda tutilgan. Bu loyihalar orqali aholining turli qatlamlari, ayniqsa yoshlar oʻrtasida milliy gʻoyalar va zamonaviy taraqqiyotga oid qarashlar uygʻunlashtiriladi.
Maʼlum qilinishicha, mazkur festival haqida Respublika tashkiliy qoʻmitasi yigʻilishida batafsil maʼlumot berilgan. Tadbirlar dasturi har bir hududning oʻziga xosligi va madaniy anʼanalarini hisobga olgan holda shakllantiriladi.
Eslatib oʻtamiz, ushbu tashabbus ilk bor Prezidentning Oʻzbekiston mustaqilligining 35 yilligini munosib nishonlashga bagʻishlangan qarorida ilgari surilgan edi. Festival nafaqat bayramona muhit yaratish, balki jamiyatda yangi gʻoya va maqsadlarni targʻib qilishga xizmat qilishi kutilmoqda.
Izohlar 0
…