Samarqandda mast haydovchi yuqori tezlikda harakatlanib, toʻxtab turgan avtomobilni parchalab yubordi

Samarqand viloyatida jiddiy yoʻl-transport hodisasi sodir boʻlib, ikki avtomobil ishtirokidagi toʻqnashuv oqibatida fuqarolar jarohat oldi. Bu haqda viloyat Yoʻl harakat xavfsizligi boshqarmasi maʼlum qildi.

Maʼlum qilinishicha, voqea Jomboy tumanidagi ichki yoʻllardan birida yuz bergan. Videotasvirlarda koʻrinishicha, Gentra rusumli avtomobil yuqori tezlikda harakatlanib kelib, yoʻl chetida toʻxtab turgan boshqa bir Gentra’ning orqa qismiga qattiq zarba bilan urilgan. Oqibatda toʻxtab turgan mashina va uning yonida boʻlgan haydovchi kuchli zarba taʼsirida bir necha metrga “uchib” ketgan.

Eʼtiborli jihati, hodisa vaqtida yoʻl chetida ikki nafar bola oʻynab yurgan boʻlib, ulardan biri kelayotgan avtomobillardan soʻnggi lahzada chetlab oʻtishga ulgurgan.

YTH natijasida har ikki avtomobil haydovchilari turli darajada jarohat olib, shifoxonaga yotqizilgan. Tezlik bilan harakatlangan haydovchi oʻz koʻrsatmasida taxminan 90 km/soat tezlikda va mast holda boshqaruvda boʻlganini tan olgan.

Holat yuzasidan jinoiy ish qoʻzgʻatilgan. Huquqbuzar haydovchiga nisbatan qonuniy choralar koʻrilishi, jumladan, haydovchilik guvohnomasidan mahrum etilishi kutilmoqda.

Soʻnggi vaqtlarda hududlarda bunday yoʻl hodisalari soni oshib borayotgani xavotir uygʻotmoqda. Mutaxassislar haydovchilarni yoʻl harakati qoidalariga qatʼiy amal qilishga, ayniqsa tezlik va mast holda rulga oʻtirish kabi holatlardan tiyilishga chaqirmoqda.