Andijon viloyatida voyaga yetmagan qiz bilan bog‘liq tashvishli holat yuz berdi. 7 may kuni bir guruh ayollar 16 yoshli qizga nisbatan o‘zbilarmonlik bilan “samosud” uyushtirgani ma’lum bo‘ldi. Bu haqda Andijon viloyati IIB axborot berdi.
Mojaro qanday boshlangan?
Dastlabki ma’lumotlarga ko‘ra, Asaka tumanida yashovchi 2010 yilda tug‘ilgan qiz va Shahrixon tumanida istiqomat qiluvchi 1997 yilda tug‘ilgan ayol o‘rtasida ijtimoiy tarmoq — Instagramdagi izoh sabab tortishuv yuzaga kelgan.
Oddiy bahs avvaliga haqoratli yozishmalarga, keyin esa keskin ziddiyatga aylanib ketgan. Tomonlar o‘zaro gaplashib olish uchun uchrashishga kelishgan.
“Samosud” va video tasvir
Keyinchalik tushdan keyin qiz va uning tanishi, shuningdek, ayol o‘zining bir necha tanishlari bilan Asaka tumani hamda Marhamat tumani chegarasidagi adirlik hududga borgan.
Aynan shu yerda voyaga yetmagan qizga nisbatan bosim o‘tkazilib, u haqorat qilingan va majburan uzr so‘ratilgan. Eng achinarlisi, ushbu jarayon videoga olinib, ijtimoiy tarmoqlarga tarqatilgan.
Tergov harakatlari boshlandi
Hozirda mazkur holat yuzasidan Marhamat tumani IIB tomonidan tergovga qadar tekshiruv ishlari olib borilmoqda. Hodisada ishtirok etgan shaxslarning xatti-harakatlariga huquqiy baho berilishi kutilmoqda.
Mutaxassislar bu kabi holatlar jamiyatda zo‘ravonlik va huquqiy madaniyat pastligining xavfli ko‘rinishi ekanini ta’kidlashmoqda. Har qanday nizoni qonuniy yo‘l bilan hal qilish zarurligi yana bir bor dolzarb masala sifatida ko‘tarilmoqda.
“Zamin”ni Telegramʻda oʻqing!
