Qozog‘istondan oziq-ovqat orasiga yashirilib olib kirilayotgan dorilar to‘xtatib qolindi

Foto: DXX

Qozog‘istondan O‘zbekistonga noqonuniy olib kirilayotgan yirik partiyadagi dori vositalari fosh etildi. Tezkor tadbir DXX Chegara qo‘shinlari va bojxona organlari hamkorligida o‘tkazilgan.

Ma’lum qilinishicha, yuk avtomashinasi Toshkent viloyati Qibray tumanidagi "S. Najimov" chegara bojxona posti orqali mamlakatga kirib kelgan. Tekshiruv davomida transport vositasida oziq-ovqat mahsulotlari orasiga yashirilgan dori vositalari borligi aniqlangan.

Farg‘ona viloyati Oltiariq tumanida yashovchi 1973-yilda tug‘ilgan fuqaro boshqargan yuk mashinasidan 52 turdagi tibbiyot buyumlari va dori vositalari topilgan. Jami 95 ming 369 dona mahsulot noqonuniy tarzda olib kirilayotgani ma’lum bo‘ldi.

Shuningdek, noqonuniy yuklarni qabul qilib olayotgan vaqtda Toshkent tumanida yashovchi 1986-yilda tug‘ilgan shaxs ham ashyoviy dalillar bilan ushlangan.

Baholash xulosasiga ko‘ra, ushbu dori vositalari va tibbiy buyumlarning umumiy qiymati 1 milliard 323 million so‘mni tashkil etgan. Holat yuzasidan jinoyat ishi qo‘zg‘atilib, tergov harakatlari davom etmoqda.

Nigina Zarqarayeva

«ZAMIN.UZ» muharriri

+ Zamin.uz saytini Google'ga qo'shing