Bojxonachilarning “pogoni”ni yulib olgan shaxsga sud hukmi oʻqildi

11-17 aprel kunlari jinoyat ishlari boʻyicha Toshkent viloyati Oʻrtachirchiq tuman sudi sudyasi X.Xotamov raisligida Nurafshon shahridagi 12-bolalar va sanʼat musiqa maktabida ochiq sayyor sud majlisi oʻtkazildi, deb yozadi Kun nashri.

Sud sudlanuvchi N.A.ga nisbatan jinoyat kodeksining 219-moddasi 2-qismi (“Hokimiyat vakiliga yoki fuqaroviy burchini bajarayotgan shaxsga qarshilik koʻrsatish”) doirasidagi ishni koʻrib chiqdi.

Maʼlum boʻlishicha, N.A. 2018 yilning 21 sentyabrga oʻtar kechasi tungi soat 04:00lar atrofida “Gʻishtkoʻprik” chegara bojxona postining Qozogʻiston Respublikasidan Oʻzbekiston Respublikasiga kirish zalida tekshiruvdan oʻtkazilgan. U post inspektorlari tomonidan Vazirlar Mahkamasining meʼyordan ortiqcha tovar - moddiy boyliklar olib oʻtmaslik holatlari tekshirilayotganda ularga qattiq qarshilik qilgan.
U bojxona talablariga boʻysunmay, inspektor N.Rasulovani haqorat qilgan, tinchlantirmoqchi boʻlgan inspektor A.Rajabovning xizmat kiyimidagi maxsus unvonining (pogoni) bir tomonini yulib olgan. U shuningdek, axloqqa zid harakatlarini videotasvirga tushirayotgan inspektor S.Abdullayevaning qoʻliga yengil jarohatlar yetkazgan.

Sud taraflar fikrlari va dalillarini oʻrganib chiqdi. Fuqaro A.N. Jinoyat kodeksining 219-moddasining 2-qismi bilan aybli deb topildi. Unga ish haqining 20 foizini davlat daromadi hisobiga ushlab qolgan holda, 2 yil muddatga axloq tuzatish ishlari jazosi tayinlandi.

Shuningdek, Oʻrtachirchiq tuman IIB tomonidan kiritilgan mahkumlar B.Boʻriyev, O.Madraximov, K.Pisenov, J.Pulatov, F.Radjapov, M.Raximov, S.Usmanov va A.Xabibullayevga tayinlangan axloq tuzatish ishlari jazosini oʻtalmay qolgan qismini oʻtashning muddatidan ilgari shartli ravishda ozod etish toʻgʻrisidagi taqdimnomasi qanoatlantirildi. “Zamin”ni Telegramʻda oʻqing!