Bosh rolni yolgʻon evaziga qoʻlga kiritgan mashhur aktyor va aktrisalar

Kino sanoatida har bir rol katta mashhurlik uchun ajoyib imkoniyat kaliti boʻlishi mumkin. Buni bilgan aktyor va aktrisalar ma'lum obrazni qoʻlga kiritish uchun ba'zida yolgʻon ishlatishga qaror qiladi. Quyidagi shou-biznes vakillari ham oʻz orzusini amalga oshirish uchun hiyla-nayrangdan foydalanishdan hech qachon qoʻrqmagan.

^{Foto: “RBK-Ukraina”}
Robert Pattinson

^{Foto: “RBK-Ukraina”}
“Sumerki” franshizasidagi mashhur vampir, “Tennet” ilmiy-fantastik blokbasteri yulduzi hamda “Betmen” super qahramoni bilan tanilgan Robert Pattinson bir vaqtlar kino sanoatiga kirib kelishga urinayotgan yosh aktyor edi. Muvaffaqiyatga erishish yoʻlida u ayyorlikdan foydalangan va bu haqda uzoq yillar oʻtib iqror boʻlgan:

“Men koʻp yillar davomida ishsiz qolgan edim. Birinchi marta Los Anjelesga kelganimda, kasting direktorlari mendan soʻnggi yillarda nimalar bilan band boʻlganimni soʻrashgan. Men esa RADA’da oʻqiganim haqida aytganman. Bu soʻzlar mening inglizcha aksentim tufayli yanada ishonarli chiqqan edi”, dedi Pattinson Mirror nashriga.

RADA (Royal Academy of Dramatic Art) — Britaniyada joylashgan eng mashhur va nufuzli aktyorlik va drama san'ati akademiyasidir. U dunyodagi eng yaxshi aktyorlik maktablaridan biri sifatida tanilgan.

Pattinsonning baxtiga hech kim uning diplomini va boshqa hujjatlarini tekshirmagan va rolga qabul qilgan.

Mila Kunis

^{Foto: “RBK-Ukraina”}
Aktrisa Mila Kunis intervyularining birida “70 yillar shousi” teleserialida Jeki Byurxart rolini ijro etish uchun oʻzining haqiqiy yoshini yashirishga majbur boʻlganini ma'lum qilgan. Loyihada ishtirok etish uchun ariza beruvchi aktrisalar 18 yoshdan oshgan boʻlishi kerak edi, lekin Mila endigina 14 yoshga toʻlgandi.

Boʻlajak yulduz oʻziga bir emas, ikki emas, naqd toʻrt yosh qoʻshib olgan edi. Prodyuserlar uning haqiqiy yoshini iste'dodli ekanligidan keyingina bilgan. Shunday qilib, “70 yillar shousi”dagi rol Milaning karerasidagi boshlangʻich nuqtaga aylangan.

Eddi Redmeyn

^{Foto: “RBK-Ukraina”}
Eddi Redmeyn iste'dodli aktyor boʻlsa-da, otga minish mahoratidan bexabardir. “Elizaveta I” teleserialidagi rolga kasting vaqtida rejissyor Tom Huper aktyordan “Otning egaridan tushib ketmasligingizga ishonchingiz komilmi?” deb soʻragan. Redmeyn imkoniyatni boy berishni istamay, ot minishni bilishiga barchani ishontirgan. Ammo suratga olish maydonchasida uning soʻzlari yolgʻon ekanligi ayon boʻlgan:

“Suratga olish jamoasi “Motor” deb baqirganida men tom ma'noda soatiga 100 mil tezlikda ot bilan pastga tusha boshladim. Men ham oʻzimni, ham jamoaning yarmini katta xavf ostiga qoʻydim”, dedi Redmeyn Konan OʻBrayenga bergan intervyusida.

Rejissyor shu vaqtda aktyorga qarata: “Sen gʻirt yolgʻonch ekansan, Redmeyn!” deya xitob qilgan. Shundan soʻng Eddi darhol ot minish kurslariga yuborilgan.

Xloya Greys Morets

^{Foto: “RBK-Ukraina”}
Xloya Greys Morets oʻsmirlik vaqtida “Gyugo” filmidagi Izabel rolini olishni juda istagan va rejissyor Martin Skorsezega yolgʻon gapirishga qaror qilgan. Film qahramon britaniyalik boʻlganligi sababli, aktrisa tinglovga britancha aksent va toʻqima hikoyalari bilan kelgan.

“Kasting direktori mening britaniyalik emasligimni bilar edi, lekin mening yolgʻon gapirishga tayyorligimni koʻrib meni olib qolgan”, dedi aktrisa.

Kris Hemsvort

^{Foto: “RBK-Ukraina”}
Boʻyi 190 santimetr boʻlgan aktyor Kris Hemsvort kasting paytida ba'zida atayin boʻyini pastroq aytishga odatlangan edi

“Men ijro etishni istagan rollarga boʻyim va gavdam unchalik mos tushmas edi, shu sababli parametrlarimni kichikroq qilib aytar edim”, dedi aktyor Radio Times nashriga bergan intervyusida.
Biroq uning baland boʻyi boshqa filmlar uchun ustunlik berar edi:

“Tor obrazi uchun qoʻyiladigan talablardan biri aktyor boʻyining 180 dan baland boʻlishi edi. Shu sababli Momaqaldiroq xudosi roliga men ideal nomzod sifatida koʻrsatilganman”, deydi Hemsvort.

Enn Heteuey

^{Foto: “RBK-Ukraina”}
Enn Heteuey “Egri togʻ” filmida bosh rolni olish uchun kasting direktorlarini ot mina olishiga ishontirgan.

“Ota-onam bir vaqtlar menga qimmatli maslahat berishgan: agar sendan biror narsa qila olasizmi, deb soʻrashsa, doim “ha” deb javob ber. Agar etarlicha harakat qilsang, ikki hafta ichida barcha narsani oʻrganib olish mumkin”.

Aktrisa rejissyorni mohir chavandoz ekanligiga ishontirgan va kastingdan oʻtgach, darhol ot minish kurslariga yozilgan. Biroq suratga olish paytida kutilmaganda ot Ennga quloq solmagan va barcha professional rodeochilar koʻz oʻngida erga uloqtirib yuborgan.

Manba: Daryo.uz “Zamin” yangiliklarini “Telegram”da kuzatib boring