Aktrisa Nargiza Abdullayeva Navo telekanalining “13-studiya” dasturi mehmoni bo‘lib, shaxsiy hayotiga doir ochiq va samimiy suhbat bilan ko‘pchilikni o‘ylantirdi. Dasturda teleboshlovchi Nasriddin Nasriddinov undan birinchi turmushi haqida savol berdi:
“Birinchi turmushingizni eslash unchalik yoqmasligini bilaman. U oila sevish bilan qurilmagan. Hatto aytishlaricha, do‘stlari bilan bahslashib, sovchi qo‘ygan yigit ekan. Bugun o‘sha kunlarni eslasangiz, nima hissiyotlar paydo bo‘ladi?”
Nargiza Abdullayeva bu savolga juda ochiq javob qaytardi:
“Qizlarga aymoqchiman: sovchi keldi deb darrov rozilik berish kerak emas. Ota-onalarning gapini eshitish kerak ekan. Ular 'bu yigit to‘g‘ri emas' deyishsa, demak rostdan ham shoshilmaslik kerak.”
Aktrisaning aytishicha, u 17 yoki 18 yoshlarida turmushga chiqqan:
“O‘sha paytda yosh edim. O‘zim ham xohlamaganman, lekin sovchilar kelaverib quyishmaganligi uchun rozi bo‘lganman. Keyin hatto tushimda ko‘rib chiqardim. Tushda ko‘rsam ham qo‘rqib ketardim, terlab uyg‘onardim — yana o‘sha oilami deb. Ma'nan ezilish juda yomon ekan.”
Uning ta’kidlashicha, u yoshlikda yuzaga kelgan qiynalishlarni hech kimga ayta olmagan:
“Odamlarning maskasi har xil bo‘larkan. Hech kimni bilib bo‘lmas ekan. Biz san’atkorlarni esa ayblash oson. 'Aktrisa-da', deb hamma narsani bizdan ko‘radi. Ammo aslida biz ham oddiy insonmiz, ehtiromga muhtojmiz.”
Aktrisaning ushbu samimiy mulohazalari ko‘plab tomoshabinlarni o‘ylantirdi va qizlar uchun jiddiy hayot sabog‘iga aylandi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
