Har yili takrorlanadigan savol — “Yulduz Usmonova qizining konsertida chiqadimi?” — bu safar ham ko‘pchilikni qiziqtirdi. Intervyuda Nilufar Usmonova bu haqda ochiq va samimiy fikr bildirgan edi:
«Onamning o‘z ishlari, o‘z konsert rejalari bor. U hurmatga loyiq inson. Albatta, xonanda sifatida kelishlarini istayman, lekin qiz sifatida “ayam dam olsin” deyman. Bu — mening konsertim. Meni ko‘rish uchun kelsin. Onam hech qachon meni sahnaga “mana, mening qizim” deb olib chiqmagan. Shuning uchun o‘z muxlislarim uchun o‘zim chiqaman», — degan edi Nilufar.
Biroq kechagi konsert bu fikrlardan keyin ham kutilmagan, shu bilan birga yoqimli lahzalarni namoyon etdi.
Primadonna Yulduz Usmonova qizining konsertiga tashrif buyurdi.
Sahnaga ko‘tarilib, Nilufarni quchoqlab o‘tirgan holda "Onam" nomli qo‘shig'ini kuyladi, uni samimiy tabrikladi.
“San'atkorning farzandi bo‘lish oson emas. Bu sahnaga men qo‘lidan ushlab olib chiqmadim. O‘zi chiqdi. Xalq san'atkorlarga ishonib to‘y belgilaydi, kattayu-kichik dasturxonga bor-budini qo‘yadi. Biz o‘shalardan ortsak kelamiz to‘g‘ri tushunasizlar. Men ham xizmatkor, sen ham xizmatkor — ikkimiz ham xalq xizmatkorimiz. Sog‘ bo‘linglar”, — deya mehr va samimiyatga to‘la so‘zlarni bildirdi.
Gapining oxirida Yulduz Usmonova zaldagi muxlislarga o‘zining hissiyotini, yaxshi ko‘rishini birgina ishora bilan qo‘lini "yurakcha" qilib bildirdi.
Bu lahza konsertning eng iliq va xotirada qoladigan qismlaridan biri bo‘ldi.
Mehmon guruhidagi foydalanuvchilar ushbu nashrga izoh qoldira olmaydi.
