“O‘zbekiston – 2030” strategiyasi loyihasida milliy kinematografiyani yangi bosqichga olib chiqish, uning xalqaro maydondagi nufuzini oshirishga qaratilgan aniq va keng qamrovli maqsadlar belgilandi. Unga ko‘ra, o‘zbek kinosi nafaqat ichki bozorda, balki jahon auditoriyasi orasida ham raqobatbardosh bo‘lishi ko‘zda tutilmoqda.
Strategiya loyihasida milliy filmlarni dunyodagi eng ommabop 10 ta internet platformasiga joylashtirish asosiy vazifalardan biri sifatida qayd etilgan. Bu tashabbus orqali o‘zbek kino mahsulotlari keng auditoriyaga taqdim etilishi, turli mamlakatlardagi tomoshabinlar uchun ochiq va oson yetib borishi ta’minlanadi. Shu bilan birga, kontent ishlab chiqarish hajmini bosqichma-bosqich oshirish ham rejalashtirilgan.
Loyiha doirasida 2024–2030-yillarda mamlakat davlatchiligining uch ming yildan ziyod tarixini, buyuk ajdodlarning ilmiy, madaniy va ma’naviy merosini yorituvchi 50 ta yirik kinoloyiha amalga oshirilishi ko‘zda tutilmoqda. Ushbu filmlar xorijiy davlatlarda, jumladan, nufuzli kinofestivallar va telekanallar orqali namoyish etiladi.
Shuningdek, milliy qahramonlar obrazini ommalashtirish maqsadida 59 ta multiplikatsion film ishlab chiqarish, ularni internet platformalariga joylashtirish va televideniyeda namoyish qilish rejalashtirilgan. Bu orqali yosh avlodga milliy tarix va qadriyatlarni zamonaviy formatda yetkazish maqsad qilingan.
Xalqaro ilgari surish yo‘nalishida esa 54 ta milliy filmni turli xalqaro kinofestivallarda taqdim etish orqali o‘zbek kinosiga bo‘lgan qiziqishni kuchaytirish ko‘zda tutilmoqda. Iqtisodiy samaradorlikni oshirish uchun kino sohasiga jalb etiladigan investitsiyalar hajmini 2,5 million dollarga yetkazish, milliy kino mahsulotlari eksportini esa 10 million dollargacha ko‘tarish rejalashtirilgan.
Bundan tashqari, ijtimoiy-ma’rifiy ahamiyatga ega yo‘nalishlar ham e’tibordan chetda qolmagan. Xususan, harbiy-vatanparvarlik mavzusida 11 ta film, jadidchilik harakati namoyandalarining hayoti va faoliyatiga bag‘ishlangan 6 ta badiiy-publitsistik film ishlab chiqarilib, keng jamoatchilikka taqdim etiladi.
Belgilangan chora-tadbirlar milliy kinematografiyada sifat va hajmni oshirish, xalqaro tarqatish imkoniyatlarini kengaytirish, investitsiyalarni jalb etish hamda eksport salohiyatini mustahkamlashga xizmat qilishi kutilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
