Dilnoza Ismiyaminova: “Shahzodaning Dilorom Omonullaevadek bastakorni haqorat qilishga haqqi yo‘q”

Avvalroq, O‘zbekiston Respublikasi san’at arbobi Dilorom Omonullaevaning aktrisa Shahzoda Muhammedovaning ijtimoiy tarmoqlardagi shaxsiy sahifasiga yozib qoldirgan haqoratli so‘zlariga nisbatan bildirgan fikr-mulohazalarini taqdim etgan edik.

Vaziyatga xolisona yondashish maqsadida Dilorom Omonullaevaning qo‘lida tahsil olgan san’atkorlarning fikrlari bilan ham qiziqdik. Chunki Shahzoda o‘z yozganlarida qanchadan-qancha iqtidorli yoshlar Dilorom Omonullaeva sabab O‘zbekiston davlat konservatoriyasi talabasi bo‘la olmayotganini, ko‘plari o‘qishni tashlab ketayotganini iddao qilgan.

Dilnoza Ismiyaminova, O‘zbekistonda xizmat ko‘rsatgan artist:

– Dilorom Omonullaeva – mening ustozim. Shu darajaga etishimda, O‘zbekistonda xizmat ko‘rsatgan artist bo‘lishimda, albatta, ularning xizmati katta. Hozir Dilorom Omonullaevaga o‘xshash bastakorlar juda kam.

Men Shahzoda Muhammedovani aktrisa, dizayner sifatida bilaman, xolos. Yaqindan muloqotda bo‘lmaganmiz. Shunday bo‘lsa-da, uning ijodini hurmat qilaman, ammo aktrisaning Dilorom Omonullaevadek bastakor haqida bunday deyishga umuman haqqi yo‘q. O‘zbekistonda xizmat ko‘rsatgan artist Sevara Nazarxon, “Nihol” mukofoti sovrindori Manzura Yo‘ldosheva, xonanda Saidaning xalqqa tanilishiga kim sababchi? Albatta, Dilorom Omonullaeva.

To‘g‘risi, bu haqda eshitib, hayron qoldim. Qanday qilib shunday betakror bastakorni bu darajada haqoratlash mumkin? O‘lmas qo‘shiqlar, “Sharq taronalari”, “Toshkent” kabi gimnlar muallifini aslida qadrlashimiz kerak emasmi? Shahzoda Muhammedova tomonidan menga nisbatan hech qanday hurmatsizlik bo‘lmagan. Biroq, ustoz otangday ulug‘, deyishadi. Shuning uchun bu vaziyatga nima deb baho berishga ham hayronman.

Manba: Qalampir.uz “Zamin” yangiliklarini “Telegram”da kuzatib boring