Mirziyoyev va Tokayev Almati shahrida norasmiy uchrashuv o‘tkazdi, deb Nova24.uz xabar berdi. 2025-yil 29-mart kuni O‘zbekiston Prezidenti Shavkat Mirziyoyev va Qozog‘iston Prezidenti Qosim-Jomart Tokayev Almati shahrida norasmiy uchrashuv o‘tkazdilar.
Muloqot an’anaviy do‘stona va ishchan ruhda o‘tdi. Davlat rahbarlari qo‘shnichilik, strategik sheriklik va ittifoqchilikka asoslangan ikki tomonlama munosabatlarni chuqurlashtirish masalalarini muhokama qildilar.
Prezidentlar Navro‘z va yaqinlashayotgan Ramazon hayiti bilan bir-birlarini va xalqlarini tabrikladilar.
Tomonlar O‘zbekiston va Qozog‘iston o‘rtasidagi ko‘p qirrali hamkorlik bugungi kunda yuqori darajaga chiqqanini alohida qayd etdilar. Barcha darajadagi aloqalar faollashgan, tovar ayirboshlash hajmi yil boshidan beri 14 foizga oshgan, umumiy qiymati 4 milliard dollardan ziyod bo‘lgan sarmoya loyihalari portfeli shakllangan. Hududlararo aloqalar, madaniy va gumanitar hamkorlik ham kengaymoqda.
Bosh vazir o‘rinbosarlari o‘zaro savdoni kengaytirish, mashinasozlik, elektrotexnika, neft-gaz, to‘qimachilik, qishloq xo‘jaligi va boshqa ustuvor sohalarda kooperatsiya loyihalarini ilgari surish bo‘yicha ko‘rilayotgan choralar yuzasidan axborot berdilar.
Prezidentlar sanoat kooperatsiyasiga doir uzoq muddatli dastur ishlab chiqish, mintaqaviy infratuzilma loyihalarini tezlashtirish bo‘yicha aniq topshiriqlar berdilar. Joriy yilda Xalqaro sanoat kooperatsiyasi markazini ishga tushirish va qo‘shma tashqi savdo kompaniyasi faoliyatini kengaytirish zarurligi ta’kidlandi.
Shuningdek, tomonlar mintaqaviy kun tartibini, jumladan, O‘zbekistonda bo‘lib o‘tadigan Markaziy Osiyo sammitlariga tayyorgarlik masalasini muhokama qildilar. Bo‘lajak ikki va ko‘p tomonlama tadbirlar jadvali ham ko‘rib chiqildi.
Prezident matbuot xizmatiga ko‘ra, uchrashuv do‘stona va konstruktiv muhitda o‘tdi.
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
