O‘zbekistonda ikki universitetda o‘qish nega man etilgan?

O‘zbekistonda fuqarolarga bir vaqtning o‘zida ikki oliy ta’lim muassasasida o‘qish taqiqlanishi sabablari muhokama qilinmoqda. Oliy Majlis Senatining Fan, ta’lim va sog‘liqni saqlash masalalari qo‘mitasi raisi Baxrom Abdullayev Oliy ta’lim, fan va innovatsiyalar vaziri Kongratboy Sharipovga rasmiy so‘rov yubordi, deb UPL.UZ xabar berdi.

So‘rovda senator mamlakatda nega bunday cheklov mavjudligini tushuntirishni so‘ragan. Fuqarolar bir necha yo‘nalishda bilim olish orqali mehnat bozorida raqobatbardosh bo‘lishni istashmoqda, biroq amaldagi tartib bunga imkon bermaydi.

Senatorning ta’kidlashicha, AQSh, Yevropa, Rossiya va Qozog‘istonda talabalar bir vaqtning o‘zida bir nechta OTMda o‘qib, ikki yoki undan ortiq diplom olish huquqiga ega. Bu yondashuv yoshlarning bilim doirasini kengaytiradi.

O‘zbekistonda esa mavjud cheklovlar ko‘p yo‘nalishli ta’lim olishga to‘siq bo‘lib, ta’lim tizimining jozibadorligini pasaytiradi. Senatorning fikricha, bunday cheklovlar ta’limning ochiqligi va moslashuvchanligiga zid.

Avvalroq senatorlar ekologik sertifikatlash va boshqa masalalarda ham fuqarolarning murojaatlari asosida vazirliklarga so‘rovlar yuborgan edi.

Baxrom Abdullayevning so‘zlariga ko‘ra, vazirlikning izohi amaldagi qoidalar talabalar va jamiyat manfaatlariga qanchalik mos kelishini aniqlashga yordam beradi. “Zamin”ni Telegramʻda oʻqing!