Oilaviy shifokorlar oyiga 1500 dollargacha maosh oladi

O‘zbekistonda oilaviy shifokorlar oyiga 1500 dollar, hamshiralar esa 800 dollargacha maosh olishi mumkin bo‘lgan yangi tizim joriy etiladi, deb nova24.uz sayti xabar berdi.

Prezident Shavkat Mirziyoyevning aytishicha, hozirda oilaviy shifokorlar o‘rtacha 500 dollar, hamshiralar esa 300 dollar maosh olmoqda. Agar shifokor va hamshira malaka sertifikatiga ega bo‘lsa, ularga maosh miqdoriga teng qo‘shimcha to‘lov beriladi.

Agar ular surunkali kasalligi bo‘lgan bemorlar bilan ishlasa, ularga kasallik bilan qanday yashashni o‘rgatsa, saraton, diabet, insult va yurak xurujini erta aniqlash, asoratlarni oldini olishni tushuntirsa, va shoshilinch tibbiy yordamga murojaatlar soni kamaytirilsa — shifokorlar qo‘shimcha 500 dollar, hamshiralar esa 300 dollargacha mukofot oladi.

“Biz shunday tizim yaratamizki, oilaviy shifokor oyiga 1500 dollar, hamshira esa 600-800 dollar oladi. Bu orqali nafaqat maosh, balki inson qadri oshadi. Ammo natija maoshga mos bo‘lishi kerak”, — dedi Prezident.

Shuningdek, Prezident saraton, insult, yurak xuruji, onalar va bolalarning erta o‘limi hamda surunkali kasalliklar oqibatidagi nogironlik holatlarini jamiyat uchun favqulodda holat deb baholash zarurligini ta’kidladi. “Zamin”ni Telegramʻda oʻqing!